台灣製作嘅遊戲一直都有唔少佳作，例如《返校》、《還願》、《眾神之鬥》等等。今次介紹嘅遊戲《小魔女諾貝塔》（Little Witch Nobeta）同樣係由台灣製作，雖然仲處於製作階段，但已經得到多個獎項。上年推出試玩版之後，更持續得到大量玩家嘅好評。呢隻作品日前終於有第一條預告片出街，以及公佈搶先體驗日期。

《小魔女諾貝塔》（Little Witch Nobeta）由台灣獨立遊戲團隊 Pupuya Games 開發，故事講述小魔女為了解開自己的身世之謎而獨自前往古堡，並邂逅神祕小黑貓，過程就等大家探索啦。遊戲以 Unity 開發，採用第三身視點，屬於動作射擊遊戲。特別一提嘅係本作曾經奪得巴哈姆特 2019 ACG 創作大賽「遊戲組人氣賞」、「Unity 特別獎」、「佳作獎」3 個獎項，質素有一定保證。

小魔女諾貝塔參加巴哈姆特ACG創作大賽得了Unity特別獎、人氣賞跟佳作等3個獎項喔!!
感謝巴哈姆特舉辦此活動，也感謝Unity提供這個獎項以及各評審的肯定，最後感謝大家，我會繼續努力完成遊戲的!!~XD pic.twitter.com/tesjRpnbmo

— Pupuya (@lsw001231) August 18, 2019

雖然遊戲類型屬於動作射擊動作，不過唔好誤會佢係一隻 FPS 式遊戲，戰鬥系統反而更偏向動作類型。同大部份動作遊戲一樣，都係有基本嘅近戰攻擊、迴避、跳躍、使用道具等動作。不過叫得做魔女，主打嘅梗係魔法，而魔法又有二種使用方式。一種喺好似 FPS 遊戲咁，手動按鍵瞄準再發射，或者鎖定目標後盲射（命中率當然有所下降）；另一種係詠唱魔法，需要使用大量魔力及需時詠唱，當然有代價同時意味住有回報，威力遠勝普通魔法之餘仲會有各種附加特殊效果。

想準確命中就要手動瞄準，懶嘅都可以靠鎖定發射，不過要打弱點的話都係要靠手瞄

詠唱魔法威力強大，但詠唱時會變得移動緩慢以及需消耗大量魔力

有唔少有趣設定，例如高處掉落會「仆街」，有一段時間不能移動

使用魔法就自然要扣 MP，一般黎講回魔手段有食藥、超慢速自然回復、怪物死亡後掉落，睇到呢度聰明嘅讀者應該會諗到「咁打王點算？」。無錯，打王時係絕對會出現「無魔」呢個情況，喺無水又無魔嘅情況下，其實仲有一個回魔手段，就係近戰攻擊命中。又因為敵人有各種屬性，例如試玩版入面嘅尾王手持大盾，而呢個盾又差唔多覆蓋晒全身，大部份攻擊打落去到係扣 0。但係使用「秘法元素」詠唱魔法具備穿透屬性，命中後仲會造成對手一段時間硬直。基本戰鬥方式詠唱魔 > 埋身近攻回魔 > 拉開距離 Loop 咁樣。

第一隻 Boss 大盾接近覆蓋晒全身，打落去嘅攻擊大部份都係扣 0

使用「秘法元素」詠唱魔法就可以穿透大盾，並造成硬直時間增加攻擊機會

當然以上戰法只係針堆第一隻 Boss 特性嘅其中一個打法，並唔係話一定要咁玩。遊戲中小魔女會學識四種魔法，每種魔法嘅特性又有分別，例如雷屬性係打遠距離、火屬係散彈咁。第一隻 Boss 戰我就試過用純近戰 + 火屬魔法打近距離戰鬥，同樣係 Work 的。另外喺準確嘅時間內，成功迴避敵人攻擊會有 Bullet Time 效果，打近戰時更加過癮刺激。（仲好有《Darksoul》味）

靈活運用四種屬性魔法，以及適當地喺近戰 / 遠攻間切換戰鬥方式

各種屬性魔法都有其好玩之處

《小魔女諾貝塔》將於 6 月 24 日喺 Steam 展開 Early Access，現時喺 Steam 商店頁面已經有試玩版免費下載，暫時只有 PC 版本。