琴日我地一篇文章關於超高質偵探遊戲《Disco Elysium（極樂的士高）》，搞緊個投票，希望收集大家意見去決定下次追加嘅語言。但係文章出街之後，讀者回覆驚見「繁體中文」選項被消失，飽受鄰近播毒大國逼害嘅香港人，第一個念頭當然係「唔通又要政治正確消滅繁中」。於是，我地立即去信官方，希望得知繁中被取消原因。喺琴晚我地正式收到回覆，答案令人驚喜，就係繁體中文化已正在進行中！

我地收到嘅回信，官方了解到繁中玩家嘅擔憂，竟然喺未正式公佈前就向我地坦承繁體中文化進行中嘅消息。佢地話撤下「繁體中文」選項，係因為喺舊年殘體中文未整好果陣，已經籌備緊繁體中文版工程，不過當時時機尚未成熟，不過而家已經開緊工了。（但唔知點解擺咗繁中選項入投票度，不過唔緊要，最緊係「有」丫嘛！）

另外喜訊唔單只係咁，係電郵中佢地特別講到了解繁中同殘體中文喺用語上嘅差異，所以並唔會完全依賴機翻。亦都因為簡轉繁呢個工程有「再創作」要素，所以已經喺台灣搵咗一位有資深文字工作經驗嘅作家老師負責繁中工作，並且保證係有品質嘅繁體中文版。（我地嘅估計係用埋落家用機版本，好大機會出家用機果陣已經有埋繁中版）

喺度衷心感謝《Disco Elysium（極樂的士高）》製作團隊嘅信賴，希望繁中地區嘅玩家快啲玩到呢隻神作啦。《Disco Elysium》已於 Steam 平台推出，同時對應 PC及 Mac。另外 PS4、XBox One 以及 Nintendo Switch 版本將於今年發售。