《動物森友會》熱潮持續，早幾個星期仲更新咗博物館「藝術廊」、狐利賣假貨等等，黎緊六月又有結婚 Event，真係 Keep 住有野玩，不過六月打後，就仲未知會有咩更新。外國就有位高手，挖掘遊戲數據，發現有好多未被使用嘅程式碼，並預測黎緊會有咩更新。

其實早喺上次「藝術廊」更新前，呢位高手 Ninji 已經出文預告黎緊嘅各項更新，並且 100% 中晒，不過當時並未受到留意，大家都當佢吹水。事實係佢嘅往績已經證明數據嘅可信性，同期佢仲有幾個發現，可信性甚高。

博物館新建築物

博物館將新增二座建築物，一個係博物館咖啡店，即係以前嘅「The Roost Cafe」，應該可以見返鴿店主「マスター」；一個係博物館商店。另外似乎舊作嘅「陶器」會再度回歸。

蔬菜種植
將新增「蔬菜種植」玩法。現時《動森》蔬菜只有大頭菜一種，仲要無得種出黎的。黎緊可以種植及採摘蔬菜，種類有蕃茄、小麥、甘蔗、薯仔、蘿蔔、南瓜。唔知有無得去人地個島偷菜呢……

海洋探索

現時海洋對玩家黎講只係得「釣魚」一個用途，不過黎緊會新增「潛水」動作。透過潛水可以獲得「海鮮」及「海藻」類物品，而魚類同釣上黎果堆係唔同的。現時數據入面有 33 款「海鮮」當中只有花蛤係已被使用的。不過佢都有補充未被使用嘅項目，可能係生物目錄中入面「海洋生物」一欄使用。

Nook 商店更新

數據入面發現「cGardening」、「cMuseum」、「cRealEstate」、「cGallery」呢四個程式碼未被使用，但佢就話可能唔係商店更新，似係用 Nook 哩數兌換嘅物品類別。

狐利互動選項

賣假野嘅狐狸現時只有購買選項，不過喺數據入面發現「選擇物品」>「狐利」項目，未來可能有得送禮比佢，但就未知用途，可能係買賣時提供提示，又或者係擴大售賣物品數量。

料理製衣項目

程式碼入面發現「get_reciple_diy」、「get_reciple_clothing」、「get_reciple_cooking」三個代碼，未來可能會出現自製 DIY 方程式玩法。亦有可能出現製衣選項，畢竟現時麻兒俾嘅布料只係改造家具時用到。最後係料理，睇返上面要玩家種菜，正正就係料理嘅食材，整體黎講都好 Match。

由於以上資料都係挖掘遊戲中數據得黎，所以可信性係非常之高。加上種種更新暗藏關係，令成件事睇落去更合理。不過都係戴返頭盔，堆資料都係睇住先（不過人地有 100% 中嘅往績……），最後都以官方消息為準。