講到煮飯仔 Game 大家都會諗起《Overcooked》，多人合作+豐富食材，不論係同朋友玩又或者同小朋友玩都係一流，但係如果將食材改頭換面變成「人肉」又點睇？由獨立工作室 Rocket Vulture製作嘅《Cannibal Cuisine》，就係玩獵殺人類做食材，然後再加以烹調，真係估唔到食人族對食都咁講究……。

《Cannibal Cuisine》基本玩法同《Overcooked》類似，都係要各玩家分工合作去收集食材、烹調、再比顧客品嚐，時間內達成指定分數就過關。喺遊戲中玩家將扮演一班食人族土著，因為信奉嘅神明 「Hoochooboo」肚餓，於是開始整大餐比佢。又因為係食人族神嘅關係，所以佢都係要食人肉的，咁食材就當然係附近嘅觀光客啦。

除咗人肉之外，食材仲有「腦」，同一般水果

唔係淨殺人架，仲要煮埋先得

作為食材嘅一方（觀光客），亦唔會企定定比你殺，佢地會有各種反應，例如逃跑、反擊等等，有時仲會有 Boss 戰添。為咗方便獵殺，所以食人族一方亦都有巫毒使用，不過影片示範入面似乎係有「Friendly Fire」，小心圍毆果陣殺埋隊友……

會還手架！

遊戲現時將提供多達 24 個版圖，當中包括海灘、火山、針山、叢林等等。有趣嘅係唔同關卡會出現各種特別設計，例如海灘會分為幾個小島，要利用機關往來；火山會噴岩石出黎；針山會有巨大機關喺後方不停追住你，各有各好玩。

畫面勁亂，好過癮

針山都好緊張，要 Keep 住逃命

《Cannibal Cuisine》預計於 5 月 20 日正式發售，對應平台為 Nintendo Switch 及 PC Steam。順帶一提，NS 版由即日起到月尾做緊 75 折優惠，而 PC Steam 版就有免費 Demo 試玩。