《魔戒》咁出名嘅作品應該都唔洗介紹，曾推出嘅相關遊戲都唔少，有無雙類、戰略類、動作潛入類，不過多數都係扮演一眾強大角色，好少話有得玩啲特別角。黎緊推出嘅新作《The Lord of the Rings: Gollum》，就要大家扮演作品中極重要角色「咕嚕」（又有人叫佢做「多比」），日前官方仲釋出實機畫面截圖，一睹神秘之地「魔多」面貌。

《The Lord of the Rings: Gollum》由德國遊戲開發商 Daedalic Entertainment  製作，改篇自知名小說《The Lord of the Rings》。遊戲其實之前已經公佈咗，不過一直都無乜聲氣。遊戲中玩家將操控「咕嚕」，屬於潛行動作遊戲。基於現時公開嘅截圖，本作嘅「咕嚕」同大家見慣見熟電影版果隻有啲唔同，皮膚較為光滑，對眼「精靈」啲，比較可愛啲。

暫時已知嘅場景有滿佈獸人嘅「魔多」，玩家需要盡量隱藏自己氣息進行各種行動。原著入面「咕嚕」係擁有二種人格，喺呢隻遊戲入面會重現呢個元素。部份情況下會出現選項，因應選項會衍生唔同嘅行動，唔知會唔會有選項係匿喺山洞度摸魔戒呢。

「魔多」上方有濃密煙霧，同小說入面所形容嘅非常相似

二種人格會出現唔同嘅選項及行動

潛行避開敵人

「魔多」以外，有一幅圖片係描述緊一堆巨型蜘珠衝向「咕嚕」，好有可能玩家意味住蜘珠森林係其中一個場景。面對感官比獸人更發達嘅巨型蜘珠，絕對係危機四伏之地。

《The Lord of the Rings: Gollum》預計於 2021 年推出，對應平台為新世代主機 Xbox Series X、PS5 及 PC。