四月份對於 Gamer 黎講係非常忙碌的，無論係要做《動森》島民，抑或要喺《FF 7 Remake》衝出米德加（感想文按此），仲有要去聖域搵瑪那之劍嘅《聖劍傳說 3 重製版》，作為玩家嘅大家，真係過得好充實。

《聖劍 3》原身為 Square（未與 Enix 合拼）於 1995 年在超級任天堂上推出嘅遊戲，故事以六個角色視點出發，不過劇本最終目的都係一樣，就是要守護瑪那女神，阻止世界落入黑暗力量手中。

我並無玩過舊版《聖劍 3》（扮後生！），所以喺寫呢篇 Review 之前，詢問左唔少舊版玩家嘅意見。佢地當中好多都認為，《聖劍 3》嘅劇本並唔算係驚天動地嘅劃世鉅作，故事王道得黎有少少老套；至於角色嘅想法同埋性格鮮明。

不過，相信好多玩家同我一樣，對角色嘅想法，可能就只係重視佢「好唔好用」？（笑）

小幽默的劇情

始終原版係 1995 年間嘅產物，所以作為一隻重製作品，劇本創作早成定局，加上廠商有提醒遊戲媒體「唔好劇透呀！」嘅關係，所以也就不討論太多了。

然而，作為一個「新世代」玩家，我可以好正面咁答你，《聖劍傳說 3》我玩得非常開心，既尋回昔日玩傳統日式 RPG 嘅樂趣，同時亦係一個好機會，比我同埋一班新玩家去感受「一代經典」嘅魅力喺邊度。

《聖劍 3》遊玩方式為城鎮與野外探索，一路行一路打，採用嘅係即時遇敵嘅戰鬥方式，進入 Boss 戰鬥前有 Save Point 及回復體力裝置（女神像），可以話係非常友善嘅設計。

銀女神像：只能存檔不能回復

六個角色初始時亦分便擅長唔同類型嘅攻擊模式，例如「獸人凱文」係近攻類似格鬥拳擊，「魔導士安潔拉」就係各式魔法詠唱配以魔枚物理攻擊等等。

《聖劍 3》最吸引人嘅地方，係佢嘅「轉職」系統，主線遊戲裡面玩家最多可以為操縱角色完成三次轉職，轉職又有分「光」「闇」屬性，每個屬性都會為角色衍生新嘅技能以及能力走向。（主線爆機後可以挑戰「四轉」，即獲得角色最強職業；不過因為有廠商保密協議，呢一部份恕我地不能著墨太多了～）

例如「公主莉絲」原身為槍兵，轉職後你可以將佢變成戰鬥系嘅女武神，亦可以變成輔助向嘅角色。我將佢變成兩次轉職都揀「闇」，佢一連串降低敵人能力值嘅魔法，再配合「安潔拉」嘅大範圍魔法攻擊，簡直係屈機。

當然，呢個只係我其中一個配搭方式！《聖劍 3》嘅一大樂趣係，揀邊三個角色歷險、又點樣去分配佢地三個嘅崗位、點樣調整佢地嘅能力，去產生你認為最順手、最理想嘅戰鬥效果，全由玩家決定，自由度高之餘，亦可以話係成隻遊戲最有深度嘅地方。

另一個特點係「環狀指令」，於戰鬥中選取指令時，時間會停止；所以就算唔切換角色，都可以同一時間去為另外兩個 AI 角色去決定行動。

比較可惜嘅係，AI 嘅系統都係做得唔夠聰明，雖然玩家可以戰鬥外時間，於 Menu 裡面為各個角色設定「非操作時」嘅行動走向，例如係 「100％攻擊」「80％攻擊＋20％輔助 」「攻擊輔助各 50％」「80％輔助＋20％攻擊」以及「100％輔助」，同時亦可以設定佢地使用道具嘅反應同頻率……

設定上係寫得好仔細的，只不過 AI 好多時候唔係好識避敵人攻擊，有好多次我轆走左，都仲見到有 AI 角色傻更更企喺敵人即將有攻擊判定嘅紅色範圍裡面，我個心就好似睇住朋友走去送頭咁……RIP。

技能有少少唔平衡，例如最重要嘅復活魔法要去到遊戲超・後・期先有，但我去到超後期已經一夫當關啦，喂呀……。

至於遊戲難度方面，我聽到嘅聲音就好兩極，有人話好難，有人話係無雙式切菜。我一周目用 Hard 開關（因為想一周目就拎最多獎盃 XD）。

我認為主線部分嘅難度係偏易的，亦無話要刻意練 Level，只係所有場景遇到嘅怪我都會乖乖打哂。如此一來，去到最終頭目戰真係好可憐，可以話係我一面倒去欺凌個 Boss，極速就 KO 了。

如果你真係想感受挑戰性，完成主線之後，繼續打後面嘅幾個頭目，相信就有趣得多。

另一點要讚嘅係，相比起《聖劍傳說 2 重製版》，今次嘅《3》真係做得好太多了。《聖 2 重製》喺未有 Patch 之前嘅 Bug 多到令人崩潰，不過《聖 3》So far 我都玩得好順，如果有機會可能想衝 3 周目試下新嘅角色配搭。

不過，場景方面就有少少失望，我明白舊式 RPG 於場景上面可能會經常重用同一個 Skin，但係，無論我去邊個城鎮，啲旅館、商店同埋 NPC 住嘅屋企，幾乎都係一模一樣嘅……w

有理由相信全部旅館係集團式經營，所以基本上一模一樣！！

如果呢度落多啲心機，一定會令玩家更加難忘。

出海：我好鍾意佢，好得意（心）

至於音樂，好多舊玩家同我講「一聽到主題曲就起首雞皮」，做到呢部份嘅回憶傳承係好事，而對於我呢個新玩家黎講，《聖劍 3》主題曲的確係非常好聽，令到玩家會聯想到一個壯闊嘅世界觀，不過每次爆機之後，都要逼玩家睇一次超長嘅 Credits 無得 Skip 呢一點要扣分（喂）

總括黎講，《聖劍傳說 3 重製版》，我玩得好開心，好滿足。佢唔係要做咩 Game Of The Year，亦唔係要做到咩 3A 大作、史詩式場景、畫面好靚 etc；佢想帶比玩家嘅，係一隻維持初心嘅日系 RPG。雖然而家新版變成單機遊戲係好可惜，但係如果有機會，我都仲係幾推薦大家玩呢隻《聖劍傳說 3 重製版 Trails Of Mana》。

P.S. 推薦大家玩 PS4 版／Steam 版，因為 Switch 版畫面真係相當麻麻。

編輯部評分：7／10