SEGA 看家遊戲品牌《人中之龍》系列一向都係 PlayStation 近乎獨佔嘅作品，而 2018 年開始雖然有落 Steam，但係目前可以喺 Steam 玩到嘅《人龍》就只有《人中之龍 極》《人中之龍 0》以及《人中之龍 極 2》三隻作品，仲要只支援英文同日文。

原本以為《人龍》會繼續成為 SIE 嘅獨家遊戲，但係 SEGA 突破性地改變策略，CFO 名越先生今日就於 XBox Series X 全球首個發佈會「Inside Xbox」上面，宣佈《人中之龍 7 光與闇的去向》將會登錄 XBox Series 與 Windows 10；XBox One 用家亦都可以玩到呢隻遊戲。

雖然確切推出日子目前未有公佈，但係呢個決定都頗令人意外，畢竟《人龍》由 PS2 年代開始，一直都係主力出喺 PlayStation 平台嘅作品。今次《人中之龍 7 光與闇的去向》將會作為 XBox Series X 首發遊戲之一，唔單止意味住 SEGA 野心藍圖擴大，亦暗示緊往後推出嘅新《人龍》作品，亦好有可能會繼續於 PlayStation 及 XBox 上面同時推出。

唔知呢個決定會唔會令《人龍》系列正式於海外打響名堂？一於就等我地悉目以待。