由「惡魔城之父」五十嵐孝司所製作嘅《血咒之城：暗夜儀式》（Bloodstained: Ritual of the Night），喺舊年終於推出，相信大家都爆晒機仲 Del 埋 Game 架啦。不過又係時候 Download 返隻 Game 啦，因為今日正式推出更新檔，將會追加新角色「斬月」以及新模式，最緊要係免費！

《血咒之城：暗夜儀式》（Bloodstained: Ritual of the Night）以惡魔城最受歡迎嘅《月下夜想曲》為藍本製作，加入眾多新元素，詳細可以睇我地嘅遊戲評測。今次更新將會追加新角色「斬月」。由於佢並非「碎片人」，所以無法使用遊戲中嘅碎片。主要戰鬥方式係「劍術」，配搭要消耗 MP 嘅必殺技殺敵。要解鎖「斬月」必需曾經以 Good Ending 完成遊戲，喺下一局就開 Game 時就有得揀佢用。

新增模式「Randomizer」，玩家可以自由調整關鍵道具、敵人掉落品、敵人分佈、任務、Save Room、傳送房間等等數值，整完自己覺得滿意嘅話仲可以上傳同其他玩家分享。透過各項數值調整（或者隨機生成），就算爆過機都會有新嘅體驗。不過我就希望佢追加新版圖同更上一級嘅難度多啲啦。

《血咒之城：暗夜儀式》今次更新即日起會先於 PS4 / Xbox One / PC 推出，不過大中華地區 (韓國、香港、台灣) 暫時未正式開放，Nintendo Switch 版本就預計 5 月尾到 6 月頭推出。

相關回帶文章：

【遊戲評測】《血咒之城：暗夜儀式》新生惡魔城 四年等待完全值得