今年四月一堆遊戲出重製版，打頭陣嘅有《Biohazard Re:3》，緊隨其後嘅有《FF VII Remake》同《聖劍傳說 3》重製。但係同月仲有隻經典大作重製版推出，不過就好似無乜人提咁。講緊嘅就係《COD: Modern Warfare 2》戰役重製版，到底值唔值得入手，就等我地睇真啲！
《COD: Modern Warfare 2》戰役重製版基本上只係將舊嘅《MW2》畫面做大幅強化，令佢符合返現代水平。劇情、槍械、關卡（總數有三章共十八關）等等部份基本構成係一樣，只係細節上有少少更改，亦無加入新劇情新任務。雖然係咁，唔代表製作無誠意。老實講，《MW2》嘅劇情本來就做得非常好，敘事手法、節奏等等都拿捏得好準確，就好似欣賞一齣長篇大電影一樣。又因為本身劇情寫得好，相隔 11 年再睇返都完全唔落伍，所以個人黎講就算無任何改動都好 OK。
知名任務「No Russian」
因為劇情上無乜改動，所以集中講下畫面上嘅進化。同舊版比較，不論係人物面相、貼圖材質、光影效果、煙霧灰塵粒子效果都有超明顯分別，並且對應 4K@60 FPS（PS4 Pro / Xbox One S&X）或者 2K@144 FPS（PC）。喺細節上面，第一章任務「Cliffhanger」入面清晰見到「Soap」面相紋理，最正係件雪褸啲羽毛有風吹過係會郁的，唔係一 Pat 野咁，足見製作團隊並無 Hea 整。
面相靚到，無呃你
新舊對比，真係有超大分別
受益於畫面提升，巴西版圖「Favela Combat」房屋色彩更加燦爛，堅有森巴味。任務「The Secon Sun」被 EMP 炸完之後，依靠微弱火光作戰，隨時被伏擊嘅氣氛比舊作做得更好。另外喺《MW》系列中，最令人印象深刻嘅「Ghost」一役，最後增加咗一個細節，令到舊玩家對條反骨仔嘅嫌惡更深，細心留意的話就會見到。
總結
要講一隻重製版好與壞，好多時大家錯誤地覺得只要對舊情節作出更改，帶新鮮感、衝擊比到舊玩家就為之好，其實只係啱一半。唔好忘記遊戲公司去重製一隻舊作，唔單只係打舊玩家市場，更加係將舊 IP 注入新元素，切合現代市場並吸納新玩家，同時兼顧新同舊玩家先係一隻好嘅重製遊戲。
《COD: Modern Warfare 2》戰役重製版，以及初代《MW》重製無疑係成功做到兼顧新舊玩家，不論劇情、打擊感、畫面表現都只能以「優秀」黎形容。雖然今集有唔少遐疵，但個人認為都係可接受範圍。特別係備受爭議嘅版圖，例如「No Russian」佢大可以用額外下載嘅方式去避開，但係官方並無咁做，應記一功。
覺得最可惜嘅，係並無同時收錄「Spec Ops」，雖然無多人對戰，不過有《MW》距離今集推出時間好近，我就覺得無都無所謂。當然最好係遲下推出《MW》1+2 合集，再包埋「Spec Ops」，咁就完美。
推薦度：★★★☆☆（只有單人劇情模式，售價略貴）
回帶相關文章：
【遊戲感想】畫面完美還原回憶每分毫《FF VII REMAKE》戰鬥與探索尚有大量改善空間
【遊戲評測】與上集比較各有千秋 《Biohazard Re:3》微妙改變更有「戰鬥感」
【遊戲評測】中譯團隊疑似暗撐香港 《COD:MW》香港人玩格外有Feel
VJGamer總編，細細個已經蒲機舖，機齡甚深，熱愛電玩文化。