大家好，又係我 Snakie 何師傅。
哩個四月可以話係一個重製月份，首當其衝既有《Resident evil 3 Remake》，唔開心既野我地唔好講喇直接去第二隻重製遊戲《Final Fantasy VII Remake》，整個暢遊過程係滿足既，Tifa 的確係功不可沒。月尾就有守尾門既《聖劍傳說3 Trial of Mana》，哩隻Remake 又做唔做大家其許既 Remake 感覺出黎呢？
兩個都係兒時玩伴，比廠商們重製後即刻高下立見。
先利申，小弟係無玩過超任既《聖劍傳說3 Trial of Mana》，所以哩條影片就唔會過份地用重製哩一點去睇哩個遊戲，換言而之，小弟會用一個無玩個原作既玩家感受去講下《聖劍傳說3 Trial of Mana》既感覺，請看：
影片以外評論 – 重製仲有咩玩法？
始終經費同 IP (Intellectual Property) 程度不一，唔能夠同返《Final Fantasy VII Remake》黎做比較，但係好可惜兩個作品無論係發售時間，排頭，操控，連廠商都係接近/一樣，所以《聖劍傳說3 Trial of Mana》真係好容易就比下去。
大家都係分ARPG，大家都係控三個人，分別真係可以好大。
小弟亦都想討論下重製哩樣野，三隻重製既遊戲，都帶出左三個感覺出黎，我地分開切入去睇下。
《Final Fantasy VII Remake》雖然嬴左第一仗，但係亦都有一個大既隱憂就係之後既改動，劇情上而家既鋪排，令到大部份玩家對第二章既期望會提升到天花咁高，如果《Final Fantasy VII Remake》第二章最後同《Resident evil 3 Remake》既結果一樣的話，到時我諗 Tifa 都幫 SE 唔到。
Capcom真係估佢唔到，《Resident evil 3 Remake》其實唔係差，只係浪費左個IP‧
而《聖劍傳說3 Trial of Mana》既重製，小弟主觀認為其實個方向係幾好，雖然無實際玩過超任版本，但係只要將以下兩段既打王既圖片埋鏡拼拼，的確係好有懷舊既感覺，而系統上同理念上既重製，哩點《聖劍傳說3 Trial of Mana》係做到出黎，相信如果係有玩過超任既朋友會有好大感觸；同時帶出左一個重製遊戲命題出黎：點先為之一個好 Remake？
每個玩家對遊戲既要求同期待都唔一致，小弟就鍾意向難度挑戰，所以愈近代既遊戲能夠帶比小弟既刺激感真係愈黎愈少。小弟對 Remake 既期許最主要係希望有返當年相應既難度。師傅係一個重度機戰迷，超現實討論我真係想《機戰Ｆ》可以重製，特別係個難度方面可以做返當年既水準係最緊要，而唔係近年既機戰，仲衰過飛行棋，飛行棋都要擲到六先有得玩，而家既機戰直情係亂黎。
《機戰Ｆ》既難度真係近10年既機戰都完全追唔到，挑戰性真係好重要！
如果繼續用《機戰Ｆ》哩個例子去討論，我相信假設佢只係將遊戲 Remaster 我覺得大眾未必會收貨（雖然我已經好開心）；又再申延哩個超現實既主題，如果佢係將小隊系統崁入去《機戰Ｆ》入面，我諗我都未必收貨，始終去返上一個問題，點先為之一個好 Remake？係無一個標準既情況下其實真係四個字，睇你點睇。
但係在我而言，我認為 Remake 需要做到一個要點就係，當新舊兩作埋鏡拼拼既時侯如果做得返個種回憶味道，我覺我已經算合格；如果係一個高分既 Remake，《Resident evil 2 Remake》就係其中一個 benchmark，既有回憶味道，又有新鮮感，可以勾起老玩家既情懷同時，亦吸引到新玩家既焦點，就係做到四個字，破舊立新。好可惜既係，四月份哩三隻既重製入面，只有阿 Jill 係做唔到，係唔合格。
哩d對比圖再加上成功既新遊戲性，真係無嘜野可以彈！
綜合黎講，相信 Remake 哩個系列會繼續出黎Cap水，始終係開發角度黎講理論上係會慳左成本，收益仲可以好可觀，同樣地，如果要打爛一個 Remake 系列，都可以好輕鬆。
我只係希望如果真係出《Resident evil 4 Remake》的話，真係唔好再資源重用再重用，悶呀。
多謝大家收睇，同樣地有咩問題同改善希望可以指點一下，謝謝你，再見諸位！
By Snakie002何師傅
澳洲毒撚，沉迷遊戲三十載。無實力唯有用毅力，推崇「用心打機，享受遊戲」宗旨。我得，你都得！