外星題材歷久常新，不過好多遊戲都係要玩家去打外星生物，如果要你掉返轉，扮 ET 去打返人類轉頭，你又會唔會想玩？由 Black Forest Games 開發嘅《Destroy All Humans!》或者可以滿足你呢個願望。

《Destroy All Humans!》預計 2020 年 7 月 28 日推出，對應平台為 PS4、Steam 以及 XBox One。遊戲舞台為 1950 年代嘅美國，因為 ET 136 號乘坐嘅 UFO 被美國軍隊擊落，ET 137 號為左拯救同伴，所以決心要打敗美國政府！

雖然以上描述聽落有少少似小粉紅，但係《Destroy All Humans!》其實係一隻有射擊玩素嘅動作遊戲，故事聽落好正經，但係大家睇完 Trailer 就會明白個設定有啲 Cult。玩家飾演嘅 ET 137 搞完美國大台電視台，又唱住 Death Metal 去牧場搞人地隻牛，救同伴呢啲咁瑣碎嘅主線，都係一陣先去做啦。

玩家於遊戲中擁有極大自由度，你可以揸住 UFO 於城鎮穿梭，隨便射「雷射槍」去攻擊啲追捕你嘅警察同軍隊，亦可以扮成人類姿態去收集佢地嘅 DNA。如果你覺得「喂呀我唔想做一隻咁鬼樣衰嘅外星人」都唔緊要，遊戲有唔同外觀 Skip 任君選擇，相信 PC 版玩家又可以多一個整 Mod 嘅樂趣了。

有啲機齡嘅朋友，或者你會覺得呢隻遊戲聽落熟口熟面，因為佢其實係 2005 年 PS2／XBox 一款同名遊戲嘅重製版黎，當年日本方面係由 SEGA 發行，唔知在座有無朋友玩過呢？

暫時未知香港 PS Store 會唔會上架，可優先考慮美版或日版 PS Store；Steam 版就支援英日語及殘體中文等語言。