喺 PC 平台上面，基本上有競技成份又多人玩嘅 FPS Game 都總會有外掛橫行，特別係各種食雞 Game，飛天遁地無所不能，對住呢啲外掛狗真係打得好無癮。為咗打擊外掛保持遊戲公平性，各大遊戲廠商都有自己嘅反外掛政策，製作最近爆紅嘅《COD: Wazone》嘅 Infinity Ward 日前出咗公告，講明黎緊嘅反外掛政策，將會實行「外掛 vs 外掛」，等你班外掛狗自己打餐死。

今次嘅反外掛政策公告最令玩家雀躍嘅就係「更新後，會將被檢舉疑似外掛玩家配對於一起」，亦即係話同場入面個個都開外掛，你識飛天我子彈識轉彎，場場都係「神魔大戰」，真係諗起都覺得搞笑。其實呢招都唔係咩新野，最先實行呢種政策嘅遊戲，應該係 EA 隻《Apex Legends》。不過佢喺隻 Game 比外掛搞到殘晒先出呢招，所以呢種做法有無效仲係未知之數。今次 Infinity Ward 咁快有反應，最低限度令玩家感受到官方會正視問題，條氣都順啲。

pic.twitter.com/sfnpJ9uwoQ

— Infinity Ward (@InfinityWard) April 22, 2020

除咗上面果樣，每當玩家檢舉疑似外掛狗，官方證實並鎖 AC 之後，該檢舉玩家就會收到郵件通知，等你知道團隊有確實跟進個案。另外仲會增加反外掛團隊人手等等。以上嘅所有政策適用於《Call of Duty: Modern Warfare》同免費嘅《COD: Wazone》。

作為一個正常玩家，喺無外掛嘅環境下打機的確係最舒服嘅事。但係 150 人嘅「神魔大戰」又好有觀賞性，話晒親眼目睹諸神黃昏嘅機會真係罕有嘛 XD。