講到用陷阱殺敵嘅遊戲，大家最熟識嘅應該都係《影牢》呢個系列。不過《影牢》主要場景都係啲中古色彩嘅堡壘、地牢等等，場景同我哋見慣嘅現代建築物都幾大分別，玩起上嚟個感覺始終都係偏向古代風。

波蘭獨立工作室 RG Crew 最新公佈嘅《PsyHotel Simulator》就將成件事現代化，玩家表面係一間靚到爆燈嘅酒店老闆，實際上係一個職業殺手，引啲目標人物住喺你嘅酒店入面，再用啲新奇刺激、古靈精怪嘅方法去「招呼」佢地。

食 Pizza 要加菠蘿？！死吧！

遊戲玩法好似《影牢》咁，用連環陷阱殺人，又可以用計去引住客「互相撕殺」，當然仲可以組合唔同嘅道具去對客人「熱情招待」！不過記住一點，話晒都係營運緊一間酒店，，客人「遺留」嘅物品記得要妥善處理，咁先有錢去買新嘅設備嘛！

《PsyHotel Simulator》將於 2021 年第一季於 Steam 平台發售，發行商 Ultimate Games S.A. 表示《PsyHotel Simulator》會登陸 Nintendo Switch ，並且不排除會於 PS5 以及 Xbox Series X 發售嘅可能性，請玩家密切留意。