Debug 不嬲都係做遊戲好重要嘅一環，如果係有競技成份嘅遊戲，系統嘅漏洞更加要及早發現，否則就好容易令遊戲並得唔公平。所以遊戲業界一直都有唔少廠商會出懸賞，希望各路嘅高手幫手搵出程式漏洞。今次 Riot 拳頭社就拎咗遊戲史上最高嘅懸賞 10 萬美金，希望有人可以「破解」到佢地嘅射擊新作《VALORANT》。

《VALORANT》係一隻免費嘅多人射擊遊戲，採用第一身視點，感覺類似《CS:GO》溝《Overwatch》。佢喺舊年十月時以《Project A》呢個名稱首次發表，之後改名做《VALORANT》並且喺今個月頭做封測，預計夏天時會正式推出。今次 Riot 喺漏洞懸賞平台 HackerOne，徵求駭客去試下破解《VALORANT》防外掛系統「Vanguard」，咁點解 Riot 對呢套系統咁有信心，梗係有原因。

根據 Riot 嘅講法，Vanguard 係佢地為咗確保遊戲競爭公平性而製作嘅安全系統，佢主要由二個元件所組成，一個係執行《VALORANT》時先會出現嘅客戶端程式，另一個係核心模式嘅驅動程式。最可怕係核心模式會得到你電腦嘅最高權限，可以操控你電腦上所有同 CPU 有關連嘅硬體，而呢個權限喺大部份情況更遠高於一般正常用戶。

反外掛程式 Vanguard 被玩家發現擁有咁高嘅權限後，出現極大量批評聲音，於是 Riot 決定用高懸賞獎金去解除玩家嘅疑慮，同時出咗一篇公告，講明公司使用核心模式只係為咗收集反作弊數據，對收集用戶私隱、電腦資料並無興趣。問題係，全世界都知道邊個係 Riot 背後老闆，你話無興趣，大家又信唔信得過你？望下之前通訊軟件「Zoom」就知啦。

更重要係信心問題，你背後老闆係邊個，心照啦

再者，早前就有玩家發現，只要開機系統就會自動執行反外掛程式 Vanguard，就算你無開《VALORANT》都係同樣執行。然後呢個「反外掛程式」係唔會喺你解除遊戲安裝時一拼解除，亦無提及任解安裝嘅方法，真正嘅「終身綁定」。我真係想知以上種種嘅問題，點信得過你係單純想防作弊？

當然，呢啲野就信不信由你。不過我個人黎講，會將佢同 Epic Game Store 睇齊，不了。