前言：首先要多謝 SIE 同埋 SE 邀請去試玩呢隻遊戲以及撰寫感想（好啦其實應該全港 Media 都有），不過，《FF VII REMAKE》嘅遊戲感想文是很難寫的。

遊戲於 2020 年 4 月 10 日推出之後，網路上一直充斥著「神作」等等的高評價，大部份男性玩家亦忙於爭論 Tifa 與 Aerith 以及 Jessie 誰比較性感、誰比較女友able。個感覺係，我寫一篇《FF VII Remake》嘅文，如果裡面會有唔滿意遊戲嘅地方、或者就女主角們作出意見的話，我大概會被罵得很難聽。

好吧，假如在 Fans 眼中《FF VII REMAKE》做乜都係完美嘅話……慢著，我又何嘗唔係一個 Fans 呢？嚴格來說我不只是《FF VII》死忠，我係《Final Fantasy》系列嘅死忠，由開始打機去到而家，真係可以話係飲 Square Enix 嘅奶水大。正正因為我係 Fans，我先覺得《FF VII REMAKE》仲有好多可以改善嘅地方。

作為一隻故事眾所周知、就算你唔知都可以喺 Wikipedia 睇到超詳細介紹嘅經典遊戲，《FF 7》個故事講乜，當然唔會係本文嘅討論重點。

讚咗先。

《FF VII REMAKE》嘅所有過場動畫嘅 CG 都好靚，完美重現遊戲中各個重要畫面，同埋一眾角色們嘅模組特別出色，於動畫方面直頭係靚得過份。

Square Enix 做片一向追求極繳美麗，例如係《蜜蜂之館》一段舞蹈、神羅公司嘅一段有關古代種嘅影片、仲有太多太多，基本上遊戲中大部份動畫都睇到我滿心陶醉（畫面靚到我狂 Cap 圖，打算 Save 喺電話電腦做 Wallpaper！！）

但係，就算係咁，我始終唔認同坊間唔少人一面倒話《FF VII REMAKE》係「神作」甚至「Game Of The Year」，No。喺「還原舊作、重塑回憶」呢一方面，遊戲絕對係拎 10／10 滿分的；但係，探索以及戰鬥上面，就有好多改善空間。

戰鬥方面，我一周目以 Normal 開 Game。《FF 7 RE》揉合「動作」要素以及原作「ATB」嘅設定，喺 ATB 滿左揀 Command 時會有 Bullet Time，呢一個概念，如果官方係想做到「新舊融和」嘅話，概念係好的。

只不過，實行上面就做得相當麻麻。首先係「Lock 鎖敵問題」。

呢張 cap 得好有喜感

遊戲中嘅 Lock 會隨著玩家位置及視點唔同而改變，即係我 Lock 咗敵人 A，就一定係有打佢嘅意義先。

舉個例，我打緊敵人 A，佢就黎 Heat 啦，然後因為敵人 B 去左我隔離，我就變左 Lock 敵人 B 了。喂，我無轉過 Lock，遊戲系統點解要幫我轉 Lock？唔應該係咁架噃！一個即時反應嘅動作遊戲，但係你鎖敵嘅對象，系統自己會自動轉，呢個設定是咪在玩 Me？

喺「設定」裡面揀「自由」以及「手動」視點嘅效果都係一樣，呢一點令人頗為無奈的。

2020.04.22 補充：Lock 敵配合玩家走位時，經常會因為視點問題而造成甩敵狀況，好多網友提醒有 R3 鎖鍵，呢一點我知道的，不過都多謝大家熱烈討論！

另一樣係平衡度問題，例如判定。戰鬥裡面，有「防禦」以及「迴避」系統，不過，因為敵人好多招數都判定極大，所以除左 Cloud 會有反擊技之外，操作其他角色嘅話，基本上係逼你硬食，所以呢一點實在係有待改進。

同時，正常出超必大絕都會有無敵時間，但係《FF 7 RE》係無的。咁唔緊要，之但係，你出技，敵人可以打斷你、Cut 你技；但係我地就唔可以 Cut 敵人嘅技。咁其實又係繼續要玩家硬食。

2020.04.22 補充：Cut 敵人技唔係講緊用大絕或者召喚獸，而係以動作遊戲嘅技巧而言；而敵人經常喺玩家好不容易儲到佢 Heat 嘅時候（又或者係玩家緊接 Heat 出 Limit 時）出動畫，到動畫完左 Heat 值歸零、 玩家 Limit 值都歸零，呢部份嘅遊玩體驗有少少無奈。畢竟去到 Hard 嘅時候，要爆 Heat 或儲到 Limit 絕對唔容易，但下下比系統動畫食左……

至於打擊感亦係做得好遜色嘅地方。Cloud 拎大劍，但係手感輕到好似普通劍一樣，而無論你係打箱、人類、怪獸、金屬敵人，個音效同埋觸感都係一樣，其實出黎嘅感覺真係好單調。好想同工作室講，淨係用視覺效果噴火花黎表示「使出痛擊了！！」咁樣係唔夠的，質感上面都仲有好多野可以作出調整。

或者有人睇到呢度會覺得我雞蛋裡挑骨頭，但係，戰鬥系統裡面沙石係多，如果想將遊戲轉型成為適用於現代嘅 ARPG，我諗，《FF 7 RE》唔應該淨係將重點擺喺「如何重塑經典而唔比人鬧」上面，而係再勇敢少少，去諗下「點樣將遊戲成為新一代嘅經典」。

正正因為我係《FF》系列 Fans，我先至愛至深，恨之切……。

另一個我覺得相當麻麻地嘅部份，就係遊戲中兩場揸車嘅戰鬥。

兩場公路賽裡，雖然話撳 R2 會加速，但係我唔係幾感受到速度個分別，車速同視點基本上都係由系統既定好的，可以話係一個表面好自由、但係實際上一啲都唔自由嘅車道戰鬥。

我個人認為車戰部份略嫌累贅，特別係尾盤逃出神羅一段頗長，轉為純動畫用 QTE 形式可能會更為有趣。

至於探索方面，最大樂趣絕對係見到唔少場景還原，例如係下陷道路嘅機械大手、古尾根留大屋、神羅總公司等等，特別係初次去到 Aerith 嘅屋企，嗰片花田山水，遠睇真係好靚。

不過，唔知大家有無發覺，唔知係工作室趕工定點，好多靚場景，遠睇誇啦啦，近睇啲貼圖都出哂事。例如係 Aerith 屋企裡面啲花，屋外條柱，隔離座山，我近睇時，喂 PS2 畫面黎嘅……

座山嘅貼圖好 PS2

左右兩邊貼圖差好遠

仲有呢度。我居高臨下望落去貧民窟，我無諗過會見到一張無層次感可言、像素又低嘅貼圖。以 Square Enix 黎講，會有如此質素貼圖實在令人驚訝，或者工作室真係趕交功課吧。

而家嘅遊戲技術去塑造全面高規格點圖，絕對係可行嘅事，當然呢部份唔算影響遊戲體驗，只係，喺同一畫面出現兩種質素嘅貼圖，感覺會有點微妙⋯⋯。

下面做乜事

同埋同一區域經常出現同一模組嘅 NPC，到底係工作室太趕，定還是係遊戲嘅另類彩蛋 LOL？

呢頭見完你

呢度又見到你

我的另類收集要素（？）

另外，要還原嘅地方有做得好靚，不過原本我好期待可以去「第七天堂」佢地嘅地下作戰室，結果居然係無左呢個場景。

去到第六區，食堂伯伯喺舊作裡面，原本玩家係可以自由入去食飯，仲有三種 Menu 比你揀；黎到重製版，飯堂阿伯只係變成支線裡面嘅少少過場動畫，玩家無得去食飯，亦無其他野可以互動，呢啲地方，我係覺得幾失望的。

要知道《FF 15》時嘅露營美食，簡直係遊戲飲食雜誌一樣，我原本期待阿伯啲定食都會有一樣程度嘅神還原！結果，沒有﹐什麼都沒有。可惜。

當然，將「爆破魔晄爐」去到「逃出米德加」呢一部份劇情，豐富到可以獨立成為一隻遊戲，工作室係有落過苦心的。

例如係地圖變大變長、增加一啲支線等等；不過，地圖基本上全為一條直路，亦無特別重要嘅收集元素，就算有所謂謎題亦非常簡單，以 RPG 黎講，實在係欠缺咗一啲趣味。

雖然喺還原度拎滿分，但係綜觀黎講，《FF 7 RE》係一隻非常打安全牌嘅作品。以 Square Enix 嘅陰險（喂！）同埋技術，喺探索部份可以變得更豐富一點。

不過，最後有一點我好想讚的，就係角色之間嘅關係，非常立體，非常實在。就本作而言，遊戲嘗試經由唔同嘅角色動畫、對白去，令玩家感受 Cloud 由冷冰冰 Poker Face，慢慢變成有溫度嘅伙伴，所以情感方面係做得足的。

例如係 Aerith 與 Cloud「夢中」那一席話、於支柱上面發生嘅「便當」，都令我忍唔住眼濕濕。

另外，Barret 與 Cloud 既關係亦都睇得我非常過癮。

Barret 今次於遊戲當中活現一位有血有肉嘅 Leader（所以佢並不完美），同時可以話係今集插科打諢嘅擔當，不過相比起舊作嘅幽默感，包括玩家可以選擇自己嘅對白回應等等，重製版喺呢方面嘅趣味都仲係略遜一籌。

比較有趣嘅係，之前《FF 15》戰勝後音樂由金毛仔唱出，今次《FF 7 RE》就由 Barret 唱出，頗有喜感。

至於《FF 7 RE》第二部幾時會出，內容又會去到邊，呢個問題，我都好想 Square Enix 快啲比到答案大家。不過，我寧願佢地慢工出細貨，畢竟今集第一次嘗試去重製經典，實在有太多不足同埋可以改善嘅地方，特別係戰鬥方面嘅問題。

然而，我都仲係好感恩的，因為重製版嘅聲優陣容無改變到，Cloud 依然係我最愛嘅櫻井孝宏，Aerith 依然係坂本真綾，遊戲尾盤仲會出現坂本真綾老公鈴村健一配嘅 Zack！對於聲優控黎講，《FF 7 Remake》絕對係另一種聲音盛宴再臨。

好期待第二章出黎既時候，可以大量聽到森川智之嘅 Sephiroth！重點無誤（笑）！

因為官方比 Media 嘅指引係唔可以出 Sephiroth 個樣嘅截圖，所以只可以出佢個名：（

《Final Fantasy VII Remake》已於 2020 年 4 月 10 日全球發行，目前 PS4 獨佔。