由德國遊戲工作室 Crytek 開發、並由 EA 發行嘅第一視點射擊遊戲《Crysis（中譯：末日之戰）》剛剛宣佈將會正式進行 Remaster，雖然正式發售日期未定，不過對應平台就非常多元化，包括 PS4、PC、XBox 以及 Switch，係系列作首次於任天堂平台上登場。
《Crysis》為系列作嘅第一集，於 2007 年首次推出，當時對應平台為 PC。工作室後來提昇開發技術，以自家遊戲系統 CryENGINE 3 改善遊戲，遊戲之後於 2011 年登錄 PS3 以及 XBox 360 平台，於歐美地區享有一定人氣。
《Crysis》以超現實的未來世界觀作為題材，主要舞台為熱帶雨林以及北韓軍事基地等場景，玩家飾演美國 Nomad 部隊中尉，為左展開營救行動，而與北韓軍隊進行戰爭。
遊戲同時有不少科幻元素，例如會有太空船殘骸以及外星生物敵人等等；除左單人故事模式，當年亦支援最多 32 人同時進行嘅對戰模式，玩家可以飾演美軍或北韓人民軍進行戰鬥。
《Crysis》當年推出時評價不俗，更獲得英國遊戲媒體 PC Gamer 評為 2007 年最佳射擊遊戲。不過，除左戰鬥方面，《Crysis》另一為玩家所讚賞嘅地方，就係超細膩及炫麗嘅畫面呈現，所以今次官方 Remaster 呢隻作品，唔知道錦上添花後效果如何呢？
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。