今個四月都幾多 Game 玩，有《動物森友會》、《海賊無雙 4》、《Biohazard Re:3》、《FF VII Re》等等，可以話多 Game 到唔夠時間，都幾「Chur」。不過其實唔係人人都鍾意咁打機，有時玩返啲優閒小品遊戲調劑下都係唔錯嘅選擇。好似咁今次介紹嘅《Sizeable》，就係呢類小品遊戲，啱晒啲無聊開黎玩二嘢嘅朋友。
《Sizeable》由獨立遊戲製作人 Sander Ambroos，使用 Unity 引擎製作。遊戲玩法其實好簡單，玩家只需要喺每關嘅小模型，搵出隱藏嘅三條神秘石柱就算過關。雖然話係搵隱藏石柱出黎，不過就唔係《Mr. Wally》果種考眼力玩法，而係透過解開謎題黎得到。遊戲嘅操作亦非常簡單，只需要使用 Mouse 嘅左鍵、右鍵同中間個滾輪就得。
操作簡單，但謎題有心思。玩家要搵出關卡內有咩物件可以移動，以及利用滾輪黎改變物體大小，從而搵出各物件間相互關係。例如第一關要啟動發電機拉起石璧，但部機要電力先郁到，然後玩家就要搵出場中同佢有互動可能性嘅物件，當去到越後面嘅關卡就越考玩家洞察力，真係幾得意，亦都呼應返個 Game 名《Sizeable》。
《Sizeable》然時仍然處於開發階段，暫時釋出嘅免費體驗版中只有五關，基本上半個鐘乜都玩晒。不過製作人講到明會 Keep 住添加新關落去，所以久唔久開黎睇下有無更新，Hea 下都唔錯。最後提一提大家，遊戲係要用 Mouse 個滾輪，而且由標題畫面開始已經要使用，周圍睇下有乜可以放大縮細就係呢個遊戲嘅重點，一陣搞到喺標題畫面卡關真係會比人笑架……。
《Sizeable》下載傳送門
動漫電玩宅，極愛金田一系列，擅長動作及策略遊戲