一直以黎買得多 Game 嘅 Nintendo Switch 玩家，一定會遇到個問題，就係部機「無位」。我哋部機無位時不嬲都得一個解決辦法，就係 Del Game，要玩果陣再 Download 過，都幾麻煩。不過今日 NS 就有系統更新，喺今次嘅 10.0.0 版本入面追加幾個重要功能，當中最重要嘅就係終於可以擺 Game 落 SD 卡了！

10.0.0 版本追加幾個新功能，當中最重要嘅就梗係擺 Game 落 SD 卡呢個功能啦！要進行呢個操作先去「設定」>「資料管理」>「移動資料到主機或 SD 卡」即可。不過玩家需要注意，就算擺隻 Game 落 SD 卡，跟 Game 嘅存檔記錄同部分資料仍然係強制儲存於主機入面。

另一重點功能，就係可以自定義手制按鍵。喺「設定」>「控制器與感應器」>「更改按鍵配置」中，可以自由設定所有按鍵。而且不論係普通 Joy-Con、Switch Lite 又或者係 PRO 制都一樣可以實行完全自定，就算 In Game 無得 Set 制都唔洗驚啦。

然後就係「用戶設定」入面嘅追加項目，新增「設定遊玩紀錄」選項，玩家可以設定「公開遊玩紀錄」及設定公開對象，以及「清除遊玩紀錄」選項，適合瞞住屋企人 / 女友偷偷打機嘅朋友使用。另外喺「頭像」入面，追加六個《集合啦！動物森友會》角色圖比人用。

最後就係「遊戲新聞」入面，追加「書籤」功能方便閱讀，最大可 Bookmark 300 條 News。

Nintendo Switch 10.0.0 版本系統更新已經上線，快手 Update 啦。