由愛沙尼亞獨立遊戲工作室「ZA/UM」所開發嘅偵探遊戲《Disco Elysium（極樂的士高）》於 2019 年 10 月 16 日於 Steam 平台上推出之後（相關報導）獲得壓倒性嘅好評，仲得到包含最佳劇本在嘅數個 British Academy Games Awards 獎項，官方早前就宣佈，《Disco Elysium》將會於 2020 年內登錄到 PS4、XBox 以及 Nintendo Switch 平台上面，正式發售日有待公佈。

《Disco Elysium》係一隻於開放世界進行嘅 RPG，故事舞台為架空荒廢都市「Revachol」。「Revachol」係一個集貧窮與罪惡於一身嘅城市，而剛剛就有一單謀殺案發生。

玩家於遊戲中飾演一名有「酒精性失憶症」嘅幹探，你嘅主線任務就係要搵出謀殺案嘅真相；不過，隨住你一路推進主線，亦會有唔同嘅支線任務會產生，同時你亦會發現有關呢個城市嘅秘密。

《Disco Elysium》雖然為一隻 RPG，但係佢同我地理解嘅玩法有少少唔同，因為遊戲並無直接打鬥嘅對戰系統；佢嘅「戰鬥」方式，係透過「對話選項」以及「技能表」去解決事件。

主角嘅四個主要技能分別是為「智力」「心理」「體能」及「速度」，而每個技能就各有六種唔同嘅輔助技能，所以總數共有 24 種技能選項。

遊戲中，玩家會獲得技能點，從而去升級技能；玩家亦可以透過「裝備」去暫時提高技能。不過，升級技能同時，係可能會令玩家角色出現「負作用」。

例如你某啲技能點得越高，當然可以方便你解決任務，但係同時會換黎自殘或者濫藥等嘅後遺症，所以絕對係一隻極考玩家心思嘅遊戲；除此之外，遊戲獨特嘅美術觀感以及音樂製作都係為玩家讚賞嘅地方。

《Disco Elysium》於 Steam 平台推出之後，於外國各大媒體以及評分網站都獲得一致好評，如果你唔想等家用機版，Steam 版除左英文都仲支持殘體中文的；至於家用機實際推出日子，我地一有新消息就會同大家跟進。

有興趣玩 Steam 版嘅朋友可以參考呢度：

以下為官方 Trailer：