我諗好多細細個玩過 LEGO 海盜主題產品嘅朋友，一定對 21322 Pirates of Barracuda Bay 期待以久。呢個由西班牙製作人 Pablo Sánchez Jiménez (aka Bricky_Brick) 以 The Pirate Bay 成功商品化嘅 21322，官方圖片公開後，雖然外觀上同原作相差頗大，但玩家們完全收貨。皆因由原作者加上 LEGO 官方設計師合作之後，我地唔只見到一個極高質產品擺喺大家面前之外，21322 亦係一個時間囊，將兒時回憶用呢一盒 LEGO 產品帶返嚟今時今日。

21322 Pirates of Barracuda Bay – 2545 件 – USD $199.99 (香港售價 $1599)

第一點先要讚一讚個包裝，八九十年代 LEGO海盜主題產品嘅復古設計，將「LEGOLAND」字樣變成產品名「Pirates of Barracuda Bay 」。

盒頂仲印埋「全家福」

開盒後，內側仲有呢啲海盜主題組件嘅插圖，你又有冇玩過？

一開箱拎晒所有件出嚟，真係唔好睇少呢 2545 件組件，總共分 15 部份加 4 大包特別組件，攤開晒成張枱唔夠擺！

打開本說明書最開心唔係佢有幾厚幾重磅，而係一打開見到 LEGO Pirates 嘅漫畫，可惜風格唔係用返 1989 年嘅版本，但作為 Fans 已經非常收貨

6255 Pirates Comic (1989)

製作說明書仲有原作者 Pablo Sánchez Jiménez 以及兩位監修嘅 LEGO 設計師 Milan Matey 同 Austin Carlson 對 21322 嘅睇法以及試作型嘅圖片！

當然仲有船長紅鬍子 (Captain Redbeard) 同佢 7 位船員嘅簡介

製作過程

先要講一講，21322 Pirates of Barracuda Bay 係一張貼紙都冇(加分)，製作過程仲同一般嘅產品有所不同。平時產品單一主題，大家跟住說明書砌，砌得多都大概會估到佢嘅流程同「套路」。而 21322 亦島亦船嘅設計下，玩家會有同時砌緊兩件產品嘅感覺，時而砌島，時而砌船，呢個製作感受可以話令 Fans 眼前一亮。

先睇船身部份嘅小島場景，用左好多同 90 年代相似嘅組件去做裝飾

島上呢個石像唔知大家仲記唔記得佢？

第一部係船身小島，呢部份係以 Connector 組件去將船身同小島接合

底部特登用組件砌出支柱支撐

外面 José’s Inn 呢個招牌，其實取材自 1986 年出產嘅 Guarded Inn

上要監牢嘅呢副白骨，究竟係邊個呢？

船身內部包括起居室以及船只 Starboard(藍色簡條背心大鬍鬚) 同 Port(紅色簡條背心大鬍鬚) 嘅寢室

將船身部份獨立睇，其實已經好有格調，而且擺放同搬運都非常方便

第二部份嘅海島乘載住船頭、船尾，依家先比大家睇睇個島嘅全貌先

當中場景設置都幾有心思同技巧

骷髏殘骸，唔知嚇唔嚇到細路呢？

仲有好多食物配件

好老實，淨係個島都成半米長，以香港居住環境嚟講，搵地方擺佢都真係有啲吃力

船頭同島就用左 Ball Joint 連接

船頭內部空間有限，裝飾亦冇太多

船頭外觀鋪滿平面，睇落更美觀

呢組船底都好幾年冇見啦

船頭雕像用返 6285 Black Seas Barracuda 嘅全黃色設計

船頭部份講完，到最後嘅船尾，船尾外觀上變成炮台同小型武器庫

內部包括船長室同廚房

廚房配件同裝飾非常充足，麻雀雖小，五臟俱全

上層船長室裝飾，直頭可以用豐富去形容

船長室雕像同張櫈，組裝方式亦非普通

船尾就只係直接放上去預設嘅 Studs 就全部完成

船身島同船尾島兩部份，只係靠中間一個榫位連接

完成！14 包組件就變成呢個咁龐大嘅 21322 Pirates of Barracuda Bay。仲有第 15 包喺邊？一陣你就知

從後面睇的話，可以睇到各個部份嘅細節

出航

21322 Pirates of Barracuda Bay 喺公開之後，大家都知佢藍本嚟自 6285 Black Seas Barracuda 呢架海盜船，並且可以變返架 Remake 版嘅 Black Seas Barracuda 出嚟。準備出航之前，睇埋全體船員後，再同大家重建 Black Seas Barracuda。

全員集合，8 個 Minifigures 當中只係得兩個有雙表情

Captain Redbeard 同 Quartermaster Riggings，經歷 31 年，Captain Redbeard 啲鬚都灰埋

Port 同 Starboard

Robin Loot 同 Jack “Dark Shark” Doubloons

Lady Anchor 同 Tattooga，特別見得到 Tattooga 身上嘅紋身非常仔細，背後直頭紋埋架 Black Seas Barracuda 落去添

船員齊集，到最後睇埋架船點樣組裝。唔好以為就咁拆出嚟就可以直接組合，船島合一之後，船上大部份嘅葉、藤、裝飾都要先清除，而且你見到桅杆、船帆以及船身部份有缺漏嘅地方，全部都係由第 15 包去補漏，先可以將 Pirates of Barracuda Bay 變成 Black Seas Barracuda。

海盜船部份同島分離後就慳返好多位置

由島變船嘅步驟中，頭、中、尾三部份拆出嚟嘅組件都唔少

第一個要補嘅係船尾，廚房門變返做船尾舵，導致船尾要補返組件上去

再裝返個船舵上去

船帆組裝有個小心得，以說明書方法去做，有機會拉扯到船帆變型，甚至有所損壞。大家可以試下以 Axle 2 Notched(4142865)接合，相對會比較輕鬆及確保美觀

Black Seas Barracuda 完成

雖然冇 6285 Black Seas Barracuda 做對比，但見到呢架由新版嘅 Black Seas Barracuda，我諗好多 Fans 都心滿意足啦

出航

「依？唔係我架黑珍珠號喎！」(設計對白)

總結

我相信完成 21322 Pirates of Barracuda Bay 嘅朋友，絕對應同佢係近年或近五年內最佳產品。有回憶有共鳴之外，經官方監修之後，加左好多 90 年代經典兼有標致性嘅產品元素喺當中，令到大家喚醒兒時嘅快樂、童真。製作過程嘅鋪排亦功不可沒，船島交替嘅製作過程，令到就算花上超過 10 個鐘嘅製作時間都完全冇悶場。

砌完產品後，玩家最頭痛係點樣安置同收藏。如果以原設定 The Pirate Bay 去製作，大家可能連開箱嘅意欲都因「冇位擺」而大大降低。 21322 Pirates of Barracuda Bay 可以變換成 Black Seas Barracuda 呢個設定，正正就幫大家慳返好多位，同時可以享受到佢嘅箇中樂趣。再者，市檜啲計的話，呢盒 21322 Pirates of Barracuda Bay 成 2545 件組件，即平均計每件組件收你 6 毫子，你話 CP 值係咪高先！

一句講晒，玩得 LEGO 嘅朋友，21322 Pirates of Barracuda Bay 係一件無辨法抗拒嘅產品！好好地將佢帶返屋企啦！