《Biohazard Re:3》（生化危機 3 重製版）都出咗成個星期，買咗嘅朋友都應該打爆晒。上集《Re: 2》開咗個靚頭，完美咁為「重製」二個字重新定義，黎到《Re: 3》應該就實食無痴牙，不過網上面嘅評價就有讚有彈，並唔似上集咁接近一面倒讚好，咁到底佢衰乜，我地又點評價呢？

先放人權圖

正常點都要講一講畫面。同上集比，感覺上光影效果、環境特效等等做得更出色，絕對係現時最高規格嘅家用機遊戲畫面；而場景上沿用二代警察局（正名：狗屋）嘅部份唔多，加入唔少新場景，特別係今集有整浣熊市街區，令人對呢座城市嘅感覺更實在。

可惜嘅係，新增場景同時，亦大幅削走舊有場景，例如舊版極具標誌性嘅「鐘樓」、「墓地」等等，亦係比人鬧得最多嘅其中一點。

個人最欣賞醫院場景，地方細，喪屍多，而且仲有「驚喜」等緊你

醫院入面有好多 X 光片，你睇個肺幾白！

當年玩得最激動嘅「鐘樓」竟然無咗，墓地巨蟲成隻 Boss 無埋，呢下真係失望

到戰鬥部份，由於《Re: 3》重現舊版「緊急迴避」系統，令到戰鬥變得更刺激、更多玩法，亦有唔少勁人開始挑戰「生化芒亨化」，用「緊急迴避」配刀仔打 Boss 戰，特別係當使出「完美迴避」（即係接近擊中時避，類似 Just Guard）會有強化效果，呢種「戰鬥感」係上集無法比到玩家的。

不過，對比舊版，感覺上用「緊急迴避」嘅時間點有啲微妙，個人黎計預判攻擊出到完美迴避嘅成功率可能仲高啲。另外係物理上亦有重新計算，處於窄巷、貼牆的話，如果再向有牆一方閃避，失敗率極高。

使出「完美迴避」後，如果用刀仔就會衝前向上斬一刀，用槍就會有大約 2-3 秒 Bullet Time

卡路士避嘅幅度較窄，但成功完美迴避會打出一拳，Licker 都即 Down

就咁睇，相信有人覺得「嘩你講到緊急迴避咁神，練熟咪無敵囉」，情況就好似舊版玩「刀仔無雙」咁，我只可以話，啱一半啦。

事實上，緊急迴避的確係神，但大多數情況只適用於 1 vs 1 對決。因為就算你練到點神，完美避只計算角色正面約 180° 範圍，喪屍喺後面咬你的話，你個 Timing 點完美都係照中的。

另外老玩家如我，打到喪屍倒地時，係會換刀仔過去補刀的；但今集倒地喪屍會有一招飛撲咬你，發動速度快攻擊範圍大，無準備的話基本上中硬，有反應撳避都係咁話。

雖然緊急迴避好好玩，不過始終會失手中招，而今集比喪屍撲到就點都硬食一下先，同時會叫你勁撳 O 制，成功的話……咬少下囉。對比上集如果手上有刀仔、閃光彈、手榴彈等裝備，就可以用黎解圍，自己就比較鍾意呢個設定。

另一樣比上集做得差嘅，就係今集喪屍無得斷手斷腳，過癮度大減。

比較鍾意二代用道具保命呢個設定

講到怪物，獵人 Beta 重新設計，造型極有電影感，更設定為外硬內軟，用普槍打都幾考功夫，最正係佢攻擊模式多，芸芸招式中暗藏一招「一擊必殺」技，打佢真係好刺激。至於 Licker 同上集大同小異，出現次數又少得可憐，加上今集有得避，算係高級靶。

到講今集主角「追跡者」（Nemesis），理論上佢係上集 Mr. X 嘅強化版，應該帶黎更強嘅壓逼感至係。但好可惜，佢真係起勢追你嘅場景只有遊戲前期，踏入中期見親佢都係 Boss 戰，完全無果種「唔知幾時係邊度追殺你」嘅恐怖感。而今集流程接近線性，謎題數量稀少，令玩家唔需要喺地圖上來回走動，恐怖感就更稀簿。

恐怖感雖然不足，但鏡頭運用極之出色，唔少追逐情節因為咁而令刺激感大增

Re: 2 Mr. X 打極都會返生，又會不停喺地圖四處走動，完全唔知幾時會見到佢，堅係一步一驚心

今集由頭到尾有超多安全屋，完全感受到製作團隊「驚你打唔爆」心態，但亦因為太多令恐怖感進一步下降

屈機安全門係玩家嘅好朋友

到最後梗係要講一講劇情，其實整體進程幾流暢，亦追加唔少補完劇情、細節去講返之前發生緊咩事。例如《Re: 2》馬文點受傷、黃衫 S.T.A.R.S 隊員 Bard 變喪屍前發生咩事（Sorry 當年搵你我只係關心你身上條鎖匙）、《Re: 2》警察局一樓點解會有個大洞等等。而各主要人物戲份都唔少（Victor 例外），特別對奸角尼可拉嘅描寫，深深感受到佢性格嘅極端（最後一幕特別死法會見到佢嘅「狠」），不過舊版中佢所展現嘅「手腕」，黎到新版就見唔到，有點兒可惜。

當年 Brad 變喪屍之前衰乜呢？

主要人物戲份多，小人物戲份就被大削。當年喺貨車避難嘅阿叔係可以返轉頭睇佢死未，而家經過就算

槍店老闆直頭係大茄喱啡，戲份少到 1 分鐘都唔知有無

唔少細節位做得好好，好似地鐵站入面嘅海報，明顯扮緊 i.t，不過入面就係講緊 Party 之類嘅野。借問聲邊個敢黎……

玩具店入面擺設嘅「洛克人」像，係用緊 1987 年美版初代洛克人遊戲封面造型，好有心

警局入面有文件講初代洋館事件，係咪暗示緊下一隻 RE 係初代？

總結

《Biohazard Re:3》比人鬧得最多嘅不外乎二點：大量 Cut 走舊有場景、流程短。

對老玩家黎講，原有舊場景除咗有滿滿嘅懷念，當中鐘樓更加係一代人嘅回憶，特別係千辛萬苦先上到去，然後睇住架直昇機比人打落黎果刻。新版大膽地削走呢啲劇場，嘗試加入新劇情去帶新鮮感比大家，但係就有少少失手。例如 Victor 火車嘅演出，由於新版同佢嘅互動極少，出黎嘅效果異常普通。雖然係咁，但新版劇情簡潔，並無拖泥帶水，又加入大量 CG 片，個人黎講係接受的。

喺一開始嘅片段帶出一個好重要嘅訊息，就係……Umbrella 前線人員擋喪屍病毒都係用緊 3M 60926！！！

至於流程短，老實講玩得熟的話，用個零鐘頭就爆到機，的確係短咗少少。特別係今集唔太需要解謎，唔洗點行回頭路，定位亦比較偏向動作遊戲，所以呢樣又鬧得無錯。但流程短唔代表可玩性低，將佢變成動作遊戲咁玩，用刀仔打 Boss 戰的確又有另一番風味。加上官方都知實際流程短，免費送多隻《Project Resistance》對戰遊戲你玩，算係咁啦。

最後，《Biohazard Re:3》雖然係一隻重製版，但其實都可以當佢係一隻新 Game，其實都唔錯丫！