幾年前曾經出現一隻極出色嘅海盜遊戲《盜賊之海》（Sea of Thieves），不過就淨係得 Xbox One 同 PC 有得玩，所以當年都識唔少朋友為咗玩佢而買機。事隔多年終於落埋 Steam，經過幾年嘅營運成隻遊戲變得非常成熟，未玩過嘅朋友絕對值得一試。

《盜賊之海》係一隻扮演海盜嘅開放世界多人合作遊戲，採用第一身視點，屬動作冒險遊戲。遊戲入面最主要玩法係透過航行、打鬥、冒險、掠奪等方式去體驗海盜生活，搵屬於你嘅偉大航道。而本作係同普通遊戲唔同，佢係極鼓厲玩家多人遊玩。因為做海賊係有各式各樣嘅工作，例如出航前要起錨、揚帆、掌舵等等，同時又要兼顧睇海圖同指南針。遇上戰鬥的話仲需要控制大炮迎擊，萬一比人打中船身又要去下層船艙「筆水」同封返受損嘅船身，而以上嘅所有野都係要人手控制，如果得一條友玩的話真係會手忙腳亂。

當然遊戲好玩嘅地方唔只係上面果啲，玩家仲會係世界中遇上其他船員，同佢地建立關係定係以武力征服任君選擇。而且仲有各種島嶼、狩獵海中傳說生物（巨大 Boss）、超真實海洋物理引擎等等，亦有貫穿故事劇情嘅戰役，橫跨 2 條壯闊故事線總數 11 篇故事、彷彿電影般的第一人稱視角任務等等，真係好多野玩。

《盜賊之海》係一隻 Keep 住會進化嘅遊戲，已經經歷五次內容擴展以及幾乎一整年嘅每月更新。而家宣佈將會出埋 Steam 版本的確係值得留意，並且講明會支援繁體中文。最後注意一點，已經向 Xbox 方面查詢，Xbox 版本紀錄並不能過渡至 Steam 版本。