期待三年，Team Ninja開發，經光榮特庫摩發行，《仁王》大獲各界好評後全新續作《仁王 2》，不過整個流程，我都係抱住複雜嘅心情去玩。因為事前製作團隊喺某訪問上曾講及「今集會比上集更簡單」，當時我地就已經打定底，免得期望越大，失望趣大。

結果呢個底真係有用，Soft Landing 無事ε(*′･∀･｀)зﾞ

先講返今次《仁王2》嘅故事背景先，時序定於《仁王》故事更早嘅時代發生，以日本戰國大名領主豐臣秀吉一生（即係光榮最拿手太閤立志傳系列嘅故事骨幹）做成隻遊戲背景。

特別一讚玩家角色製作角色嘅素材幾乎有晒成個《無雙系列》模組比玩家捏，未正式開 Game 都已經歡愉左大半日（喺 Twitter 搵 #Nioh2_code ，仲有世界各地玩家嘅作品連埋  Code  比大家參考）

來源：#Nioh2_code

來源：#Nioh2_code

來源：#Nioh2_code

正式開 Game，打擊感維持到上集高質素水平。視覺效果直頭超水準，水、火、冰等效果材質，或者好輕易被玩家忽略，但係相比好多 AAA 級作品都做得細緻。

人物角色設計超越好多頂級作品，竹中直人呢個選角真係完全無得頂！完全演活左豐臣秀吉嘅一生，我直頭以後一望到「豐臣秀吉」呢四個字，就諗起竹中直人個樣！遊戲界 2020 年最佳男演員，佢絕對榜上有名。

搵竹中直人做豐臣秀吉，真係 Good Casting

我想大家留意啲火咋！

講完優點就講下缺點啦，製作人宣稱嘅比上集更簡單的確冇講大話，不過情況有少少失控，變成玩家極為強勢，導致遊戲嘅刺激感同難度相比起「魂系遊戲」（即 Dark Souls 類）略為遜色。武器種類加埋上、中、下三段攻擊，睇落變化好似好多，但當你見到地上面嘅狂屍（即係死去玩家嘅AI）來來去去都係某兩款武器為主，你就知道今集邊款武器強勢。

一地都係薙刀、鎖鐮、大太刀……

「守護靈」系統係有加左好多新元素，表面上係對玩家更為「友善」嘅系統，不過就令遊戲難度進一步推至低谷。「猛、迅、幻」三個不同狀態，妖怪化後會有加攻、加速或者遠攻嘅效果，但其實最終目的都只不過係臨死前變身令自己多一條血。

另外新動作妖怪特技 （R2+O），亦唔太需要咩技巧，敵方放大傷害招式時會出現一度「紅氣」，玩家只要見到紅氣時立即用妖怪特技反擊，隻怪就會企定定比你入一 Set。

至於另一新系統守護靈技（(R2+△、□或x） ，就係擊殺敵人後隨機掉落嘅「魂核」，裝備後就會變成嘅特殊技，需要一定嘅妖力發動。可惜「魂核」類型眾多，但因為性價比關係大部份玩家去到尾都只係會用夜刀神技能，令其他技能變成陪襯。

妖怪特技 （R2+O）呢招真係太屈機

當你見到三隻夜刀神同隻怪抖纏，我有一點點戥隻怪慘

上集唔夠打嘅時候，玩家可以召喚「稀人（玩家）」或「助人（NPC）」幫手，而今集可召喚人數增加到兩人（最誇張可以見到 5 人同行），王關三打一嘅情況下，好多時房主為免戰死累大家冇得玩落去，都會採用食住花生睇住兩位「稀人」同王打生打死戰術。

不過同朋友連線合力亦有問題存在。單機情況下，就算待命開返隻 Game，都會喺最後一個 神壇 Checkpoint 繼續遊戲；但如果要邀 Friend 一齊連線打，對方就必需處於「未開任務狀態」先有得 Join Game，否則的話，就要利用道具「神籬之木」（保持身上精華）離開任務，先可以同朋友玩。

至於自己本身打緊嘅進度，當然係隨住離開任務而要由頭玩過…..呢個問題上集已經存在，今隻依然無改善，的確係敗筆。

包抝頸用大太刀上段，結果真係有少少「魂系」遊戲嘅刺激感

唔怕死，不過怕召喚左嘅稀人完唔到任，拎唔到獎勵

遊戲版圖的確設計到好似「魂系遊戲」格式，可惜版圖上冇特別裝備、道具等等供玩家探索，只係得「木靈」、「魑魅」呢類對遊戲流程冇太大影響嘅收集元素。而遊戲入面超過七成嘅捷徑都係唔會重覆使用，特別係好多時都係開完捷徑行多幾步就有新嘅 Check Point，顯得多餘。

最比佢吹漲係開完捷徑，隔離就有個 Check Point

而角色培育方面同傳統魂系遊戲亦有明顯分別，每一點成長點數對角色能力影響非常大，本來唔夠力打 Boss 的話，屈下 LV 升多幾點再打過，就算用返同一種打法，同之前都可以話有天壤之別。

就算之前打唔贏，升多幾 Lv、執靚套裝就打得過！Yeah~

總結

與其話《仁王2》係「魂系遊戲」，歸類於 ARPG 可能更加貼切。劇情令我最失望嘅地方唔單只係犯駁，結尾想畫龍點睛，點知就做多咗變成畫蛇添足。明明手到拿來嘅劇本，最後一章變成有大台式垃圾結局，反高潮到反晒白眼。不過如果你自問對劇情同難度唔太講究，純粹想同朋友玩返隻有質素嘅動作遊戲嘅話，真係要比個機會試下《仁王2》，你絕對可以喺當中拎返滿滿嘅歡樂。