太空加恐怖野最具代表性嘅作品相信係《Dead Space》無誤，黎緊就有隻新 Game《Quantum Error》極有前者味道。呢隻由 TeamKill Media 開發嘅新作將會喺最新世代主機 PS5 上登場，日前仲出埋條預告片，感覺唔錯。

《Quantum Error》採用第一身視點，屬宇宙射擊恐怖遊戲。喺預告片中見到主角去到一個未知嘅星球，並且去到一座疑似出事嘅太空站探索。影片中氣昏營造唔錯，畫面更加屬於精細果類（不過開發中畫面同出街畫面好多時係二回事）。影片尾段見到有一大群喪屍迎面衝向主角，正常戲路就應該係一段激戰黎，不過睇個款都應該 GG。

現時遊戲處於開發中階段，資料唔多亦未有正式發售日期，只係明確表示會於 PS4 及 PS5 平台發售，慢慢等下啦。