我地玩 Action Figures 嘅玩家，最煩係啲配件或者效果件冇乜選擇。淨係講流血效果呢樣特效件，官方廠又唔會出，外國三方廠或者私人製作講緊一灘仔血都要一舊水起錶。而最近比我搵到間澳洲叫 Slideffects 專做 6 吋 / 1:12 Action Figures 嘅特效件公司，平平地唔洗兩舊水有一 Set 流血效果特效件，收到即刻同大家試玩。

大大小小 16 個效果

透光物料，唔係啲一灘實色泥膠扮血，唯一可惜氣泡太多，搞到好似啫哩咁

就咁一灘野？你以為咁簡單嘅我就唔會特登介紹比大家啦！

Slideffects 佢地出嘅呢批流血效果件，最特別嘅地方係遇熱可以重新塑型，玩家只需要風筒吹熱或浸熱水後，就可以將得到咁樣嘅彎曲效果。

放落 Figure 度效果真係非常唔錯架

除左流血效果， Slideffects 佢地仲有其他特效件製作，有興趣嘅朋友除左可以搵 Slideffects之外，亦可以搵香港代理 玩具箱Toy Box 訂購。