恐怖遊戲經典作品《鐘樓》（Clock Tower）有返咁上下機齡嘅朋友都唔會陌生，想當年比果隻較剪人追殺真係嚇到瀨屎。喺多年前就有位遊戲開發者想製作一隻紀念《鐘樓》嘅作品，發展多年後就發展成今次介紹嘅作品《Remothered: Tormented Fathers》，遊戲早二年於 Steam 推出 Keep 住得到大多數好評，最新消息係 Nintendo Switch 同 PS4 玩家都玩到啦。

《Remothered: Tormented Fathers》由 Stormind Games開發，係一款冒險解謎恐怖遊戲，採用第三身視點。遊戲中玩家將扮演女主角「Rosemary Reed」，為咗解開少女「Celeste」下落不明嘅真相，因此潛入少女身染怪病嘅父親「Felton」博士豪宅家中，可惜事敗於是就要邊搵真想邊逃出生天。

遊戲劇情細節出色，不過就無謂講太多留返比玩家自己體驗。比較特別嘅係本作嘅遊戲系統可以話係集百家之大成，類似《Outlast》咁，遊戲中係無任何槍又或者強力武器，玩家可使用嘅道具都係防禦性而且只係日常常見嘅普通道具，非常貼近現實。另外參考咗《Slient Hill》、《Alan Wake》等作品嘅聲音系統，玩家可以透過聆聽追蹤者腳步聲推段大約距離，再決定逃跑定匿藏。匿藏的話就有機會被敵人發現、但逃跑的話會引起巨大聲響，視情況再選擇作出咩行動，另外遊戲中玩家係沒有血量槽的。

萬一被敵人發現，好多時會進入「QTE」狀態，而本作其實都有幾大量嘅「QTE」情況，玩家需要係特定時間快速進行指定動作，失敗就 GG。同時為咗保持緊張感，遊戲係使用實時加載技術，即係玩嘅於豪宅內探索係接近無縫，唔會有 Loading Time。

《Remothered: Tormented Fathers》已於 3 月 19 日推出，對應平台為 PS4 / Nintnedo Switch。留意本作嘅續集《Remothered：Broken Porcelain》將於今年內推出，對應平台為 PS4 / Xbox One / Nintnedo Switch 及 PC。