《權力遊戲》（ Game of Thrones）電視劇大熱，同時亦都令好多人對中世紀國家以及城堡感興趣。上星期就推出咗一隻遊戲以中世紀為背景，扮演一國國王嘅王國經營 RPG 《Yes, Your Grace》，玩落先知道原來做國王真係唔容易。

《Yes, Your Grace》同我地玩慣玩熟果種王國經營遊戲唔同，本作屬於角色扮演遊戲，而扮演嘅對象當然係國王。身為國王就梗係唔會親自走去「開墾農地」、「開發工業」，主要嘅工作就係每日於皇宮謁見各種人物，聽取各種意見及情報，從中分析情報嘅真偽以及作出相應嘅決策（要顧嘅野多到嘔）。又因為每個決策都有機會令王國覆滅又或者係更強大，完全感受到果種「人會因為自己利益而講大話」、「信錯人結果家毀國亡」等情況。（有玩過一段就係比同盟陰，信佢開波打仗，打到白熱化就比封信黎話「我地唔會支援你」，好PK）

主要場景「謁見之間」

做錯決定隨時滅國，而呢個決定可能只係 Click 咗個選項……

雖然主要場景都係皇宮謁見之間，但都有機會上戰場玩打仗。不過唔好以為好似《AOE》果種有兵仔比你控制咁玩，實際上你仍然係一個國王，身處遠處嘅山頭，因應戰場情況聽取各位「專家」意見（通常意見都係「我都未見過唔知點做」），再下命令叫佢地自己搞掂。然後你就會發現除非有突發情況，唔係的話國王嘅位置其實都非常被動，特別係處於劣勢時就更覺果種「無力感」。

打仗畫面大約係咁……果班「專家」同香港班官真係一樣咁廢…….

《Yes, Your Grace》已於上星期推出，並且持續獲得一致好評。暫時對應平台只有 PC Steam，售價 HKD $89，好抵玩，順帶一提遊戲中音樂做得非常出色。