《一拳超人》上年播放第二季動畫，咁見勢好當然就順便出埋 Game，之前隻手遊仲賣廣告賣到成行成市。手遊以外，上個月尾出嘅 PS4 遊戲《一拳超人無名英雄》亦都唔少人期待，而我地之前喺日本試玩時嘅對新穎嘅玩法亦都感覺良好。抱住滿滿嘅期待遊玩正式版，可惜換黎嘅真係尤如屎一般的遊戲體驗。

先講遊戲畫面，《一拳超人無名英雄》用返動畫風格表現，場景雖然簡單但個人認為尚可原諒。最大問題出自於一眾角色模組，就算係自創角色身體比例都頗為奇怪。而喺原作仲就算係敵人，都會有各種頗具特式設計，好似「蚊女」、「阿修羅獨角仙」之類都非常獨特。但係本作登場嘅一眾嘍囉角色設計都非常地「Hea」，加上瘋狂重覆果幾個款，悶到我玩一陣就想瞓。

玩家唔係扮演老師，而係要你整隻原創角色去體驗，而且角色配件比起《Jump Force》少亦缺乏特色

呢個款嘅怪人我都唔知打咗幾多隻

上面所講嘅其實只係小問題，最大問題其實係黎自強制要玩家遊玩嘅「故事模式」。

雖然試玩時本作係類似《 Jump Force》式嘅對戰遊戲，但係完整版中接近所有野都係靠「故事模式」拎返黎。例如對戰遊戲入面最重要嘅角色，係要透過「故事模式」入面幫對應嘅英雄做相關任務先會解鎖。如果你想學相關英雄嘅招式的話，就要重覆做對應英雄嘅任務，累積好感度就會學到。但係英雄任務並唔係做完任務一就接住做二咁樣，而係做完任務一之後，可能要推一輪主線任務先會隨機再遇到該英雄發出任務請求。

想用該角色就要解佢嘅支線任務，如果要學佢嘅招就要提升好感度

一般城市任務，接任務條友叫我幫佢送文件比朋友，而個朋友只係距離佢幾步（後面紅色旗仔個位）……先生你係咪跛架？

咁你可能話推主線其實都無乜所謂，當睇故仔咪得。開頭我都咁諗，但係當你每做 2 – 3 個主線任務後，就會叫你返去做普通任務累積英雄聲望，而呢堆任務多數都係重覆打 N 隻低等怪人，過程冗長無聊。其實如果佢想玩家體驗劇情的話，我寧願佢一關一關咁玩，劇情以動畫帶過，過關後解鎖相關角色及相關招式。如果咁做的話仲來得爽快直接，好過而咁局住要你玩埋晒啲低能任務隔硬拉長隻 Game。

如果想玩對戰模式，Sorry 都係要喺「故事模式」入面去對戰櫃枱辦理

可能你會話只係想輕鬆下，唔介意做無聊任務純粹想享受遊戲，咁就要講下呢隻遊戲嘅戰鬥系統。《一拳超人無名英雄》嘅戰鬥系統有 90% 係照抄同廠嘅《Jump Force》，基本都係輕、重攻擊、必殺技、閃避同擋格，同樣係一隻三對三對戰遊戲。同《Jump Force》一樣表面上係必殺技互射，實際上都有連招技巧，有技術的話係可以一套連技打一行血的（前提係你要肝到原創角學夠招）。

識連技的話一招帶走一行血都不成問題（例如武器B 正方 x 3 > ↑+三角 > 野太朗 x 3）

雖然「故事模式」做得差，但係遊戲並非無可取之處。本作最特別嘅地方在於如果隊中有一人係琦玉老師的話，該隊開戰時就會只有二人出戰，而開戰後會有一個倒數時間，呢個倒數時間其實就係琦玉老師趕到現場嘅時間，如果玩家戰鬥途中作出特定 Combo 又或者緊急閃避對方攻擊的話就會縮短到場時間。

留意當隊中有老師的話，該隊伍只有二行血，如果係老師趕到前被打敗就當輸

戰鬥途中作出特定 Combo 又或者緊急閃避對方攻擊的話就會縮短到場時間

當老師到場後，會先打出一拳同時進場。同原作設定一樣，所有角色都係一拳搞掂，講緊嘅唔係話用必殺技果種一招死，而係普攻就一拳死……，而且所有角色都無法對老師做成傷害。要避免呢個情況發生就只有喺老師到場前擊敗對手又或者…….同對手一齊揀老師用。

基本上老師到場就等同勝利，對方點打都扣唔多你幾多血

老實講呢個系統設定係幾新穎有意思，切合返原作英雄趕去現場嘅過程，而且比起測試時平衡度有調整過，要拖成四分鐘絕對唔易，亦即係揀琦玉老師再唔係必勝，變相要玩家開發更多角色，令整體攻防節奏更快。

要拉打接近四分鐘絕對唔係易事，開發其他角色有實際必要

戰鬥中途會發生各種各樣事件，利用得好的話可以反敗為勝

雖然有有趣嘅系統，但係相比起《Jump Force》本作節奏及角色動作明顯「硬」好多。角色收招動作慢、閃避動作硬，角色倒地起上時並無無敵時間，緊急閃避判定過份嚴謹，種種因素令到戰鬥過程極不爽快，特別係呢幾日玩《我的英雄學院 2》更覺得《一拳》嘅「硬」，絕對係本作最大嘅敗筆。

同《Jump Force》比明顯人物動作較「硬」，爽快度亦大大遜於前者

總結

之前試玩時其實真心覺得幾過癮，但開 Game 後逼你玩「故事模式」已經非常不滿，我諗無人希望打成個鐘頭係為咗開隻「深海王」。如果係更為純粹嘅對戰遊戲，我諗評分會高返好多。至於動作過「硬」嘅部份其實可以透過更新改善，不過現時比我嘅遊玩體驗就真係好差下，對比《我英 2》真係差非常遠。

當然如果閣下對老師非常有愛，又唔介意做無聊任務的話，《一拳超人無名英雄》對 Fans 黎講都算 ok 嘅，起碼唔洗你課到痴線都係得隻背心之虎先啦。