上星期有傳聞話大熱作品《鬼滅之刃》將會遊戲化，今日官方正式對外公開二款作品。分別係手機遊戲《鬼滅の刃 血風剣戟ロワイヤル》，以及 PS4 遊戲《鬼滅の刃 ヒノカミ血風譚》，同時開埋官網以及由動畫製作公司 ufotable 所繪製嘅圖片。

手機遊戲《鬼滅の刃 血風剣戟ロワイヤル》係一隻非對稱生存動作遊戲，玩家可以選擇做「鬼」又或者「鬼殺隊」陣營，至於係邊個獵殺邊個就真係講唔埋啦。基本玩法同《Dead by Daylight》、《第五人格》類似，但相信作為「鬼殺隊」唔會只有逃跑躲藏一途，應該會有更強力嘅戰鬥手段。

本作由 Quatro A 負責製作（曾製作《東方キャノンボール》），並由 Soleil 協力開發（由原 Team Ninja 岡本好古創立），ANIPLEX 則負責企劃及發行。遊戲預計會於今年上市，同時對應 iOS 及 Android 平台。

PS4 遊戲《鬼滅の刃 ヒノカミ血風譚》由 ANIPLEX 負責製作，類型為對戰動作遊戲，由於係地第一次製作家用機遊戲，估計會向其他遊戲參考，比較合適嘅參考對象有《Naruto to Boruto: Shinobi Striker》同《龍珠Z：卡卡洛特》。而遊戲主線劇情都係講炭仔遭遇滅門慘案之後成為鬼殺隊嘅過程，又因為官方預計下年先出，所以估計最後 Boss 會打埋無慘，當然詳細情報都係要等官方之後再公佈。

另外《鬼滅之刃》其實並非首次遊戲化，之前有一隻叫做《鬼滅の錬磨》嘅 2D 橫向遊戲，以《鬼滅》第三卷動畫光碟特典嘅姿態出現過，不過而家入手可能無咁容易，有興趣就回帶睇返我地之前報導啦！