小島神隻《死亡擱淺》（Death Stranding）搞到唔少玩家迷上做送貨仔，事實上我都識朋友唔鍾意打打殺殺，寧願慢慢送貨欣賞遊戲內嘅景色（玩 GTA 都淨係揸的士接客）。新作《Cloudpunk》就提供一座超巨型嘅 Cyberpunk 城市供玩家暢遊，扮演送貨仔去同各式各樣嘅人類、AI 等編織故事。

《Cloudpunk》獨立遊戲團隊 ION LANDS 所製作，遊戲類型屬於角色扮演冒險遊戲。玩家將會扮演主角 Rania，而佢係一間叫做「Cloudpunk」半合法送貨公司嘅員工。玩家將駕駛磁浮飛車，穿梭於巨大城市 Nivalis 每個角落，純熟迅速送出每一件貨品。

面果浸就係咁玩，實際上透過同每位客仔交流去了解背後嘅故事，同時送貨賺錢改裝自己架車。另外除咗駕駛模式，仲有機會有步行嘅場景，以便玩家探索各種謎團以解鎖更多故事。而官方亦有講明玩家與居民間嘅互動選項會對城市造成深遠影響。

《Cloudpunk》預計於 4 月 24 日發售，會先於 PC Steam 平台上架並支援繁體中文。另外 PS4 / Xbox One 及 Nintendo Switch 版本則預計於今年內上架。