啱啱《Final Fantasy VII Remake》出咗 Demo 比大家試玩，坊間雖然有讚有彈，但係點都無損佢係一代經典嘅事實。

佢嘅製作人北瀨佳範除咗《Final Fantasy VII》之外，當年仲有一隻經典遊戲都係由佢製作，就係《寄生前夜》系列第三集《The 3rd Birthday》（雖然劇情被唔少玩家喻為屎一般）。

日前 Square Enix 官方 YouTube Channel 就出咗條訪問片，入面就問到北瀨佳範關於《寄生前夜》新作相關消息。

呢次訪問主角分別係新日本職業摔角選手 Kenny Omega 同北瀨佳範，雖然主要嘅內容都係同《Final Fantasy VII Remake》相關，但因為北瀨佳範同時係最後一集《寄生前夜》製作人，Omega 當然唔會放過呢個機會，問下有無新作嘅相關消息啦。

咁北瀨佳範就話「係佢所認知嘅範圍中暫時並無新作消息，但《寄生前夜》中嘅角色係做得非常有深度而且豐富，唔使用呢班角色簡直係浪費！」（呢度講嘅「唔使用」相信係指開發新作或重製）。

其實近幾年坊間有非常多聲音希望《寄生前夜》重製又或者推出新作，而 Omega 亦都話現時恐怖遊戲已經非常流行，《寄生前夜》系列內嘅 RPG 元素，既原創且獨特，現時根本無其他遊戲好似佢咁，所以都係時候做決定是否應該重製或開發新作。

以一個玩家角度睇，當個製作人都講到咁白，SE 係咪都應該考慮下炒一炒呢碟冷飯呢，定因為《Biohazard RE:2》將重製門檻定得太高，嚇到唔敢整？