我諗所有高達迷去親日本一定會去台場朝聖，因為果度由 2012 年開始就有一隻 1：1 嘅 RX78-2 元祖高達豎立係度。雖然 2017 年 RX78-2 已經退下火線，由 1：1  可變身嘅獨角獸高達取代，但其實隻元祖高達並唔係消失咗，而係為咗《機動戰士 GUNDAM 40周年計劃》做準備，今年 1：1 元祖高達將會立於大地並會步行，而呢個咁歷史性嘅時刻日前就由一班媒體見證住「第一步」！

今次「開發現場參觀」由技術主管技術總監石井啓範，設計主管創意總監川原正毅以及負責機芯系統主管吉崎航主持。會上有提到過往嘅元祖高達其實通過腳部與地下間嘅結構固定支撐身體，只係一件不能移動嘅「物件」。但今次嘅高達因為要移動，所以設計時必需更輕量化，因為佢係一件「機器」。所以開發時目標係最大 30 噸，之後一直改良設計，例於用碳等新材料、改用電力而唔係全部液壓裝置，最終將整體線條變得更苗條、頭部及背包縮少，最後成功減到得 25 噸。

左起技術主管技術總監石井啓範，設計主管創意總監川原正毅以及負責機芯系統主管吉崎航

原版同新版對比

當然佢地並無透露高達實際運行細節，但係控制每個零件例如手、甲板、托架嘅系統將獨立運行，而最後展示時高達骨架嘅右肩及左腳有進行大幅度移動，令在場人士非常之感動，相信正式展出時一定令 Fans 感受到「高達立於大地嘅感動」。

1：1 可動 RX78-2 元祖高達完成後將會喺  GUNDAM FACTORY YOKOHAMA 上發布，預計會喺今年 10月橫濱和山下碼頭開業，為期一年。門票預定由 7 月開始發售（未知幾錢），有興趣嘅朋友要留意啦。

官方網站報導傳送門