平面動作遊戲大家唔會陌生，呢類型遊戲多數都係控制一位角色遊玩，最多都係比你換角玩，但好少話會有一堆人比你同時控制。今次介紹嘅《Bookbound Brigade》（封書冒險隊）玩家就正正係控制「一堆人」黎玩，突破固有框框，都幾新穎有趣。

《Bookbound Brigade》由 Digital Tales 開發，屬平面橫向動作遊戲，只支援單人遊玩。遊戲故事講述結集傳奇故事嘅「書中書」被壞人企圖破壞，如果書本被破壞的話書中世界便會滅絕，當中嘅人物亦會消失，於是八位著名嘅文學人物決定聯手拯救世界並踏上旅程。

喺《Bookbound Brigade》世界入面並無單一嘅主角，玩家控制嘅係「一堆人」。呢堆人分別有領導圓桌騎士嘅英國國王亞瑟王、吸血鬼德古拉、俠盜羅賓漢、《綠野仙踪》主角桃樂斯、天才發明家尼古拉‧特斯拉（Nikola Tesla）、花果山美猴王孫悟空、19世紀英國維多利亞女王、特洛伊木馬公主卡珊卓，全部都係文學故事又或者歷史人物。

為咗配合返故事背景，遊戲美術採用類似《Cuphead》嘅手繪風格，令玩家更易投入，有別於一般「類惡魔城」遊戲嘅像素風格。

本作同一般遊戲最大嘅分別就係玩家控制嘅係「角色集合體」，簡單講就係由角色們組成嘅小隊。而呢個小隊需要因應各種情況而去使用各種陣型，分別有「方陣」、「縱排」、「橫排」以及「環型陣」。四種陣型會令小隊嘅面積改變，同時仲會影響小隊嘅移動速度同跳躍高度。例如狹窄地方嘅地方就需要用「橫排」進入、高位就需要用「縱排」跳上去等等，多種陣型特性令玩家喺遊玩時感覺更多元更具挑戰性。

另外因為玩家控制嘅係一整個小隊，而隊中每位角色都有自己嘅特性同技能，點樣去運用好每位角色已經難玩之處。而且亦因為有咁多人，所以每次普攻都係隨機一位角色出招，亦即係玩家無法確定自己下一次攻擊嘅形式，無形中大大增加遊戲難度，相信都幾難玩下。

《Bookbound Brigade》預計於 4 月 23 日推出，對應機種為 PS4 / Nintendo Switch / PC Steam，支援繁體中文。