壽屋 x 小島製作嘅 Ludens上星期日本發貨，而今日都終於有貨見街啦！個盒 Size 就同平時壽屋出開嘅差唔幾，不過未開箱先有驚喜！大家留意左下角！

小島神譽用藝術總監新川洋司嘅簽名呀！

好多人可能唔記得小島製作呢個 Ludens 嘅由來，其實係源自 1983 年荷蘭學者 Johan Huizinga 著作《Homo Ludens (遊戲人)》。而呢本《Homo Ludens》簡單幾隻字介紹的話，內容主要就係講「遊戲」點樣去影響人類進化文明。而小島嘅 Ludens (全寫FROM SAPIENS TO LUDENS)其實代表自己能夠「喺新世界中，成為帶嚟新遊戲嘅先驅」。

睇返開箱，製作書入面有埋新川洋司對 Ludens 女體化嘅少少設定圖，組件分色嘅情況非常充足，素組後淨係「滲線」都已經好足夠。無貼紙、全水貼，部份金屬色嘅位置都預先上色，加上初回限定送多個特別髮色組件同三組未落水貼加工嘅面部部件比玩家自行加工，所以話「壽屋出得嘅女體模型係有返咁上下保證！」

唔開都唔覺佢身上嘅「白色」都分唔同嘅色度

預先有印刷或上色嘅組件

美中不足係「透明藍旗」係單面印 LOGO，而「黑旗」有晒雙面印

Ludens 身上都冇其他「Kojima Productions 小島製作」嘅 LOGO，但水貼都預多三個比 Fans 拎嚟用，都算非常有心

初回限定送埋左邊嘅半透明黃色髮型，以及三組未落水貼加工面部部件

到時砌好左，再影相比大家睇啦。