上年推出嘅《Biohazard RE:2》完美地演譯咩叫「重製」，一眾玩家超級受落之餘亦都好期待黎緊嘅第三集重製。距離正式發售仲有個零月，終於有遊戲實機畫面睇。今日日本媒體《電擊 Online》掉咗條《Biohazard RE:3》實機遊玩影片出黎，再一次向遊戲業界示範乜野叫做「重製」。

影片前部份展示 Jill 同 Carlos 合作喺地下鐵逃出嘅過程，及後則展示各種場景、對喪屍戰以及被追跡者（Nemesis）追殺過程，最後以 Boss 戰完結。遊戲片段解答咗一眾玩家問題，就係三代獨有神技「緊急迴避」會否重現，答案係「會」，而且仲除咗 Step 之外仲會有翻滾動作。想當年熟練此技嘅朋友係可以一把刀仔走天下，睇黎各位刀神要準備出山了。

另外美版嘅官方 Twitter 亦都喺今日宣佈《Biohazard RE:3》會同上集一樣，會先推出體驗版比大家玩。雖然仲未有推出時間等情報，不過估計應該會同上次一樣都係「One-Shot」版本，亦即係限時內可以任意遊玩及不限死亡次數（對上一次係限 30分鐘），但超過時限後就無得再玩咁解，相信近日官方會有相關情報釋出，大家留意下啦。

//twitter.com/RE_Games/status/1232334712275861508

《Biohazard RE:3》預定於 2020 年 4 月 3 日推出，對應平台為 PS4 / Xbox One / PC。