去年同大家介紹過《DreadOut 2（小鎮驚魂 2）》嘅公佈消息，時至今日，呢隻受到日本經典恐怖系列《零》啟發嘅遊戲第二代終於喺 2020 年 2 月 20 日上架，對應 Steam 平台，定價 HKD 89，於 2 月 29 日前入手仲有九折優惠。

《DreadOut 2》由印尼遊戲工作室 Digital Happiness 開發，係該公司系列作《DreadOut（小鎮驚魂）》嘅第二集（另一集前傳介紹連結按此）。恐怖遊戲大家玩得多，不過大多係日式恐怖，或者係生化攻擊，以印尼本土嘅都市傳說作為遊戲大綱，對於大部份玩家黎講，應該有一定新鮮感。

同 2014 年推出嘅《DreadOut》一樣，今集嘅女主角依然係可憐嘅 Linda，遊戲最大特色係受《零》啟發，可以用 Smartphone 嘅相機閃光燈去震懾鬼怪之外，今集亦加強左戰鬥要素，Linda 可以用刀、斧之類嘅武器與鬼怪進行近身戰，所以動作成份與血腥程度大大提昇。

Linda 係一位印尼高中生，不過，自從《DreadOut》事件以來，其他同學都對佢生人勿近，加上 Linda 身邊總係發生各樣奇怪事件，Linda 就利用自己嘅「靈感」嘗試去靈界搵出怪事嘅源頭，是為今次遊戲嘅開始。

玩家於遊戲中除左可以見識到印尼嘅街道模樣，今次嘅「對戰場景」仲包括印尼嘅大街小巷、學校、宿舍、廢棄酒店、荒蕪大宅等等，絕對可以令玩家於印尼深度遊！

遊戲流程亦很簡單易懂，Linda 用手機拍攝靈體、用閃光燈嚇窒靈體、然後就係拎武器開始手起刀落，而所有遇過嘅靈體都會登錄到 Linda 手機裡面嘅「Ghostpedia」。

除左戰鬥部份，今集《DreadOut 2》嘅日間探索元素亦豐富不少，玩家可以與 NPC 交流，了解各式資訊，亦可以中和遊戲嘅恐怖感。

《DreadOut 2》已經於 Steam 上架（連結按此），目前遊戲只對應英文，又係比玩家學英文嘅好機會喇！！！！