近排因為抗疫問題，多左同朋友討論一個老生常談既問題：「近排有咩 Game 好玩？」。

哩個問題入面既「近排」同「好玩」，其實同時間性與遊戲性，係無實際關係，因為可能問哩個問題既朋友，連上年既 Game of The Year《隻狼》都無玩過；所以隻 Game 係咪新出，同隻 Game 好唔好玩，係無直接關係。

最主要都係，你會唔會去玩？

Game of The Year《隻狼》，唔係個個受得起。

終於可以入正題，今次介紹既遊戲《Hades》，大早係 Dec 2018 Epic Store 上面有 Early Access，都係近代電腦遊戲既其中一個製作方式：遊戲完成度未夠 100%，製作團隊會用一個較低既價錢，先推出有限度既 Demo 比玩家試玩，從而令到團隊有穩定收入去繼續製作及更新遊戲。

早買早享受既玩家可以以 Early Access 購入，遊戲一邊製作一邊更新，並且可以享受更新前後既分別；正式推出先買既玩家可能會比一個較高既價錢購入一個 100% 完成度既遊戲；分別在於，Early Access 既玩家可能會承受一個風險：遊戲因為各種問題無法完成推出市場，簡單講就係，「被撻訂」。

Early Access 的確係對有誠意既廠商有好大幫助，不過奸商亦都可以從中搞事。

製作團隊 Supergiant Games 其下作品包括《Bastion》、《Transistor》、《Pyre》 及今日介紹既《Hades》。團隊作品以歐美美術風格畫風及遊戲深度為主，有興趣既朋友可以去 Steam 睇下佢地有 Bundle 發售緊。

《Hades》終於係 Dec 2019 擺脫Epic Store 既魔掌加入 Steam。

小弟有玩過《Bastion》，絕對值回票價有餘既好遊戲之一。

《Hades》故事方面，目前為止都未有一個好明確既表達：主要講主角 Zagreus 為左逃離廢老老竇哈迪斯（Hades）控制既地獄世界（Underworld），出去奧林帕斯山（Mount Olympus）尋找家母。

遊戲入面有大量大家都耳熟能詳、但其實唔係好知佢做咩既希臘神，例如有《Puzzle and Dragon》既戰軍神，木希等等。

鬼妹同日本妹，係難揀既。

遊戲由地獄開始，一路打到上山頂，最後嬴左老竇之後，主角就會唔知點解死左，然後再去返地獄，無限輪迴。

製作團隊表明遊戲故事只係暫定，正式推出既時候可能會有第二個故事或解釋各樣。聽落去好似好無厘頭，遊戲重點就係在於：無限輪迴。

第一次爆機然後再被自殺真係唔知咩事。

我地一步一步探討哩個遊戲既深度，先講解遊戲特式，暫時有五樣武器比玩家選擇，其中包括：

• Stygian Blade（劍），簡單直接普攻或大範圍 AOE。
• Eternal Spear（矛），極靈活遊走及中距離攻擊。
• Heart-Seeking Bow（弓），最遠距離及單一爆發。
• Shield of Chaos（盾），多變動武器，遠近兼備。
• Adamant Rail（鎗），中距離大爆發武器。

操作方面每款都有不同，大致上可分為普攻，重擊及 Dash，各種武器有特別 Skill Set 等等。

鎗係一月份既更新既武器，證明製作團隊更新速度有一定保證。

揀好武器之後就可以開始逃生。遊戲每一層有特定怪物及陷阱，清場後可以選擇下一關既報酬，可以選擇強化角色能力，金錢或其他貨幣，血量上限回血等等。

直到第三十層去到山頂見到自己老竇仲要殺埋佢，哩個 Run 就為之完結，然後無限輪迴，由起步開始。

最後樓層就會打自己老竇，戰勝之後，就會返到地獄入口。

遊戲除左爽快度極高之外，重點就係 Rogue-Lite 玩法。作為 Rogue-Lite 遊戲，每一次既逃生都會同上次唔一樣，因為每一次報酬同技能既選擇都唔會一樣，而且不同技能同武器既配合可以令到每一次既逃生都好似新既一樣。例如攻速較高既劍，強化後可以變為攻速較慢既重攻擊，改變角色打法。

遠距離既弓，強化後可以將儲箭變成連射瞬發，可以將由遠距離遊擊打法變成近距離靈活走位。

每一層都有機會遇到之前所講既希臘神，會賦予不同既技能，從而改變武器打法，令遊戲變化更大更有趣，亦都係 Rogue-Lite 遊戲既最大特色。

例如雅典娜（Athena）可以令到角色係   DASH既時候產生反彈（Deflect），將遠程攻擊反彈到敵人身上；木希阿提密斯（Artemis）可以令到角色有爆擊效果，將攻擊力提升到極致。兩者配合就可以做到一個效果：每當有危險既時候 Dash 一下，做到有限度既防禦，同時用最大攻擊力打擊對手。

除此之外，仲有各式各樣技能加強或者改變武器動作，令到每一次既遊戲都有唔同既攻擊模式！

由一個普通既Dash變左一個有反彈盾既Dash絕對可以由走路變成追殺！

每一個技能都有分稀有度（Rarity），同抽蛋一樣，每一次都好似神 Up 一樣可能會有驚喜。同時，亦都同抽蛋一樣，可能你玩緊戰軍神（Ares），以一擊走位為主，但係佢出左個 Legendary 既宙斯（Zeus）技能，以攻速為重點，結果同《Puzzle and Dragon》一樣，一個光屬一個火屬完全唔夾，又變左一個限定倉管，得物無所用。

圖中就係一個尷尬既 Legendary Boon，因為打尾王既時候魅惑（Charm）可能真係用唔著。

技能以外就係武器既分別，上述所講既五種武器（暫時），通關之後可以作進一步強化，其中暫時已經開放既矛開放左關刀模式，令到本身以中距離同投擲打法既矛，就會因為強化成關刀變成一個儲氣吸血既流派。

可以見到矛暫時有四個形態比玩家選擇，都係會改變武器打法。

關刀可以用特定招數吸血，但係血量上限會有下降，想無缺點咁用關刀就要不停打材料升級！

簡單黎講，每次既逃走，都會因為玩家選擇唔同既武器，同埋每遇到唔同既神比你既不同技能，可以配搭出完全唔一樣既打法，再次食返 Rogue-Lite 哩個主題。

除左自身強化之外，遊戲仲可以強化其他元素，，透過每一次既逃走，玩家可以得到各種強化貨幣，例如黑暗元素，鑽石，裝飾等等。哩一類既貨幣可以提升技能稀有度，金錢，或者有機會遇到更難既試鍊，從而獲得更多既貨幣或者道具再一次強化。

除左可以提升死亡次數同血之外，仲可以調整運氣等自己整一個啱用既神 Up 出黎！

製作團體都知道現今遊戲要整到長壽襟玩，就咁 Rogue-Lite 已經唔足夠。所以遊戲通關後就會開放 Hell Mode，令到遊戲難度同打法再一次改變，而且報酬亦都會相應改變。去到遊戲大後期，可以練到主角同超人一樣咁好打黎虐殺敵人，亦到可以將敵人變到石頭一樣咁硬淨黎自虐自己。

愈大獲愈快樂，因應 Heat Gauge Level，可以得到既報酬亦都會相應提高。

每一次既逃走，如果順利由頭打到尾，其實大約都係半個鐘倒，暫時小弟買左兩日都已經打左十八個鐘，就當每次都半個鐘一次，都已經嘗試逃走左三四十次，只有兩次係成功咁大罷。幾位朋友買左 Game Time 已經過左一百個鐘，耐玩度絕對有保證。

幾經艱辛，小弟打左十八個鐘終於用弓嬴到第一次！

Rogue-Lite 類 ARPG 遊戲需要愈黎愈多，然而有質素同畫風比較有水準既其實唔算太多。小弟認為《Hades》既 PROS＆CONS 可以分為：

PROs：
• 少數 Rogue-Lite ARPG 有大作水準；
• 爽快度結合運氣抽技能絕對令遊戲耐玩度大增；
• 遊戲設計到每次逃走都只係半個鐘，Kill Time 好選擇；
• 更新速度非常合理，大約一個月會有一個大型更新，刺激玩家可以繼續逃走；
• 價錢公道，而家都只係賣緊港幣 $109，平過口罩，抗疫一流。

$109，邊爐口罩洗手液都買唔到啦。

CONs:
• 暫時只有 Steam 及 Epic Store 有售，可能要等到正式推出先有 Switch 版本；
• 易學難精，對於輕度玩家可能覺得上手困難；
• 針無兩頭利，Rogue-Lite 玩法代表要成功做出極致技能配合難度過高；
• 單機遊戲可能非現今主流

綜合評分：85

總括黎講，小弟認為港幣 $109 已經係物超所值，假設你唔係重度玩家，可能只係玩廿個鐘，除番開黎計，你係比緊港幣五個半一個鐘，仲平過菲傭，都未計個菲傭唔會更新仲要加保費添。

如果你問得「近排有咩Game好玩？」，又鍾意 ARPG 類遊戲，想輕鬆進行遊戲，又或者想試下未試過既 Indie 類，小弟極力推薦《Hades》。其實隻 Game 係有殘體版，但係小弟就寧願睇英文都唔想見到甩皮甩骨既文字，大家可以自行斟酌。

《Hades》其實語言問題不大，坦白講以前唔識字去玩日文《FF7》都一樣會流眼淚啦。

當然，如文中開頭所講，問完你都係唔會去玩既，咁咪當睇下遊戲新聞囉。

最後附上遊戲 Game Play 尾王片一段，希望可以吸引到大家玩，反正小弟相信而家同你講打邊隻 Game 大家都係第一時間 Search YouTube。打法劇透注意！

ＰＳ：多謝大家收睇，第一次投稿有咩問題同改善希望可以指點一下，謝謝你（們）。

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。