喺講《Persona 5 Royal》之前，容我講返少少初代《Persona 5》嘅事。
《Persona 5（女神異聞錄 5）》可以話係一隻非常完美嘅 RPG。遊戲初次推出為 2016 年 9 月 15 日，記得當時推出首日我已經坐定定煲，一玩沉迷，難以自拔；充滿驚喜嘅劇情、幽默而人性化嘅對白、與其他角色充滿人情味嘅互動、充滿靈活性嘅 RPG 戰鬥系統……全部，都令玩家一玩傾心。
《P5》唔止係系列作中最高銷售量、 以及獲得最佳評價嘅作品，更加於 2017 年嘅 The Game Awards 拎到 The Best RPG，以日系 RPG 黎講，絕對係極高殊榮。
《P5》我當年兩周目白金爆機，相信佢係 PS4 年代最令我喜愛嘅遊戲之一。
我買呢兩個角色嘅周邊買到窮
人氣大爆發嘅《P5》，事後推出動畫、漫畫、大量周邊作品，令到作品更為大眾熟悉；而喺事隔三年之後嘅 2019 年，官方宣佈推出《P5》嘅加強版本《Persona 5 Royal》，強調除左加入全新角色（例如芳澤 かすみ）之外，仲會將故事劇情延長、並加入新地城等等。
一句到尾，《P5R》值唔值得玩？好唔好玩？
我認為，如果係從來未玩過《P5》全新玩家，一黎就直接玩《P5R》嘅話，相信你會覺得趣味良多，會覺得佢係一隻唔錯嘅遊戲。
但係，如果你同我一樣，2016 年時已經將《P5》玩到滾瓜爛熟，而家接觸《P5R》的話，或者，你會有啲失望，因為嚴格黎講，《P5R》可以話係《P5》嘅大型 DLC 而已。
第三次爆機系列
可能你又會話，咁官方都講到明係加強版，你班舊玩家嘈啲乜？
話說遊戲推出之後，Amazon JP 上面充滿住舊玩家嘅負評，內容大多離不開「頂你根本係 DLC 黎」以及「新劇情畫蛇添足」等等評語。
兩樣我都好認同。
想睇更多負評可以＜去呢度＞；睇完你會覺得我呢篇感想真係好厚道 LOL
《P5R》加入嘅新角色們，的確係令故事豐富左，亦都令到遊戲耐玩性高左，難度亦可以話係提高左（因為每日行動嘅時間分配更加需要花心機）。
不過，之前官方主打力推嘅新成員芳澤 かすみ（聲優：雨宮天），講到好似會係怪盜團常駐角色咁，但係，結果要到《P5》原本劇情爆左機，玩家先有得攻略芳澤嘅故事，我想一親芳澤啫，都咁難！（對唔住好爛）
一來遲遲都未有得將芳澤入隊，二來，芳澤於遊戲中嘅劇情，其實大多都淨係與主角互動，劇情後半無啦啦講到芳澤同成個怪盜團好似已經好熟、好有默契咁樣，個人認為有少少牽強。
我為左玩到最後部份嘅芳澤篇，基本上又將遊戲重頭到尾攻略一次，即係第三次玩呢個遊戲……。於三年內將一隻 RPG 爆三次機，我都覺得自己係真愛。
又：因為佢太遲入隊，Level 太低，我根本唔想用佢
然後，明智呢個角色，其實我覺得佢喺《P5》咁嘅形式收尾，係最理想嘅安排。《P5R》為佢寫嘅新劇情線，我覺得太多犯駁位，係咪因為角色人氣高就要特登加佢劇情呢？留啲遺憾明明先係最完美嘅結局。
當然，《P5R》並唔係咁差，我重申，以上嘅怨言係以舊玩家身份發言，但係，假如我係第一次接觸《P5R》，相信都仲係會覺得遊戲非常吸引。《P5R》無論喺地域探索、以及戰鬥裡面，都加入左更加豐富嘅元素。不過，故事上安排黎講，我始終認為《P5R》的確頗為畫蛇添足，呢一點唔知各位讀者認唔認同。
迷宮新元素：其實有同無都無太大影響
官方話佢係《P5》嘅「補完」，當初一開始好強調有好多新野，所以吸引左唔少舊玩家買遊戲（仲要賣得一啲都唔平！）；不過，我爆機之後，其實真係無咩特別大滿足感，反而令到我失望嘅地方就頗多。如果你同我一樣係《P5》舊玩家，而你都仲係好有愛地想攻略新迷宮、感受嗰少少新元素嘅話，請你做好重頭玩遊戲嘅心理準備，亦請你唔好期待會有咩驚喜。
總括而言，對於未接觸過《P5》嘅朋友，其實我始終認為《P5》做得比《P5R》更完整，劇本亦更為圓滿……所以相比起《P5R》，我其實更加推薦新玩家們入手《P5》，可能會獲得最大趣味，亦更能感受「神作」嘅威力。
《Persona 5 Royal（女神異聞錄 5 皇家版）》日文版已於 2019 年 10 月 31 日推出，繁體中文版會於 2020 年 2 月 20 日上市。
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。