【遊戲評測】久違了的RPG《龍珠Z 卡卡洛特》令每位玩家都樂在其中

《龍珠》咁多年黎出過嘅 RPG 真係廖廖可數，我對上一隻玩過嘅已經要數到超任年代果隻《龍珠Z – 超級撒亞人傳說》。等咗咁多年，《龍珠》終於有新 RPG Game《龍珠Z 卡卡洛特》，到底隻 Game 係咪坊間講到咁好，又好喺邊度呢？

先講畫面，遊戲畫面以動畫風格呈現，整體黎講表現算係幾好，地表、海洋等地型雖然略嫌單調但係都叫做可以接受，至於城市感覺上就比較細。遊戲劃分為多個區域，雖然每次切換區域都要等 Load Game，但係入區後完全唔洗 Load 野，加上遊戲高速飛行表現極為流暢，玩起黎非常有速度感，爽度十足。

畫面表現算係咁

高速移動畫面表現流暢，遊玩間完全無 Drop Frame 情況出現

雖然地圖略嫌單調，但各種地標都有好好還原出黎。例如《龍珠》第一期出現嘅阿樂屋企，可惜嘅佢真係地標 Only，無特別野玩

《龍珠Z 卡卡洛特》劇情由撒亞人篇侵略地球開始，一直打到魔人布歐篇完結。每一篇都會好似動畫咁一集一集去，而且整體節奏控制得幾流暢，雖然主線劇情有刪減但大致上都無影響遊戲體驗，值得一讚。但係打爆機之後就發現有個吐糟位，隻 Game 叫「卡卡洛特」，但係真正用悟空嘅時間唔多，接近有一半時間係玩悟飯，呢點就似乎同 Game 名唔係幾 Match 啦。

故事由撒亞人侵略地球開始

遊戲起碼有一半時間係玩其他角色，如果個名係《孫悟空一家與他的朋友們》好似會更 Match

劇情雖然有刪減，但係基本上應有嘅大致上都有保留

每一篇都會好似動畫咁一集一集去

遊戲入面最令我驚喜嘅反而係支線任務，整體都做得頗為出色。雖然任務內容都係收集下物品、打下怪呢類野，但係劇情上補完咗原作缺少嘅細節。例如一個支線係講斯路遊戲開波前，琪琪想同悟空搞次家庭旅行，悟飯因為唔想做電燈膽於是就話有事去搵魔童，睇返時間點應該就係悟天出世嘅契機。（斷估咋下！）

當初製作人話唔會有悟空小時候玩係頗感失望的，但估唔到一班悟空兒時遇到嘅角色會以支線任務型式登場，都算係一種安慰

支線任務有小雲小吉登場！

呢個支線玩阿樂死果個梗，相信各位玩家玩到呢 Part 都有會心微笑

由其他 NPC 口中亦會得知大戰對普通人嘅影響，令玩家更有喺「龍珠」世界活動嘅感覺

遊戲中會出現一種叫「回憶之地」嘅地方，到達後可以睇到一段過去故事嘅簡介

本作嘅戰鬥系統攻擊手段主要分為格鬥戰同氣功戰，格鬥戰包含破防、暈眩等技巧，較為刺激。隨角色成長，格鬥連段 Hit 數會越黎越多，但因為敵人出招有霸體關係，甚少機會可以打晒成套，加上有神技「腹擊」就更無必要打晒全套，呢點明顯設計上做得不足。

近身格鬥戰有技巧的話都可以打到幾百 Combo，打起上黎係幾爽的

近身格鬥戰只要打爆對方暈眩值就會進入「Break」狀態，有一段時間可以瘋狂放題

「Break」狀態下使用特定技能仲會有特殊畫面睇

至於氣功戰就主要係中遠距離鬥射，除咗龜波之外後期仲會有「極大元氣彈」、「超大爆炸攻擊」呢類攻擊範圍極大以及威力誇張嘅招式，令到氣功戰係安全性及效率上遠遠優於格鬥戰。當然講就咁講，因為一直喺遠處屈波其實係幾悶的。

後期齋用比達狂放「超級大爆炸攻擊」已經夠清場

對方出大招時只要配合時間同時出龜波類招式就會變成「鬥波」

隊伍中其他角色可以手動按輔助技，個人極推薦餃子「超能力」，全角色都食，一定時間內不能活動（當然太陽拳都好勁）

戰鬥系統防守部份大致上分為「擋」同「閃」二種，「擋」就齋咁實 L2 就得，不過當受到一定傷害時就會被破防，破防狀態下角色所受傷害會提升以及有一段時間不能操控。而擋格狀態下可以使出「爆氣」（扣部份換來短時間無敵及震開敵人）、「閃身」閃去敵方背後使出轟飛攻擊（扣大量氣），因應情況再決定用咩招解圍。

「閃」就即係敵人攻擊就打中你時按 X 就會閃開敵人攻擊，時機亦都幾好掌握。不過面對敵人突進招式時，閃唔到被命中的話就會進入硬值狀態，同樣有一段時間不能控制。另外仲有一種情況就係敵人出大招時，畫面會設換為另一種視角，呢個時候就要加速飛走閃開攻擊，而且每隻敵人嘅大招都唔同，幾有心思。

打悟空阿哥就會第一次面對大招，要避呢招只需要上下避就得，但之後敵人嘅大招會越黎越多元化

每位角色都有獨立技能樹，不過遊戲到中後期資源基本上多到用唔晒，唔洗擔心唔夠料升人

一隻 RPG 遊戲除咗角色育成之外，好多時都會有啲輔助系統，本作就有叫「社群」嘅系統。呢個系統玩家要插入各種主要靠做支線得返黎角色徽章去增加社群數值，而每個社群會有對應嘅加成，例如最有用嘅「修行」社群去到 LV10 時就會加多 100% 經驗值。有趣嘅係呢啲角色徽章如果相互間有特別關係的話會有額外加成，例如撒旦先生加布歐就會有特別加成。

「修行」社群去到 LV10 時就會加多 100% 經驗值，非常有用

角色徽章間仲暗藏可能係之後 DLC 嘅彩蛋，好似呢個人物加成係「超」嘅劇情

戰鬥以外仲有各種小遊戲玩，個人覺得打棒球係最好玩的

最後不得不提嘅就係成個作品嘅重心「龍珠」，《龍珠Z 卡卡洛特》係有得收集七粒龍珠並且許願。隨劇情發展神龍亦都會升 LV，由開頭一個願望升都最尾三個願望。而且仲跟足原作設定，每次許願後要過一年（現實二十分鐘）之後龍珠先會復活，係幾得意。

每二十分鐘就可以叫神龍出黎，有心刷的話錢同道具都唔係問題

總結

雖然自細睇《龍珠》大，但我算唔上係忠實《龍珠》Fans，不過《龍珠Z 卡卡洛特》整個遊玩過程係愉快的。亦都因為劇情表達清析，所以適合完全未睇過原作嘅朋友玩。

戰鬥簡單易入手，打擊感亦都做得出色，真係要挑剔的話就係雜卒敵人種類太少，黎黎去去都係果 4-5種，以一隻 RPG Game 黎講真係少得可憐。至於另一個問題就係可操控角色只有五位，實在太少。回想舊作《龍珠Z – 超級撒亞人傳說》可以練到餃子、阿樂一拳打死菲利，感覺係好爽的。如果《龍珠Z 卡卡洛特》二週目後可以自由揀選操控角色的話就更為完美，希望之後嘅 DLC 可實現呢樣野。

如果你問我《龍珠Z 卡卡洛特》十分滿分值幾多分的話，我會答你起碼有八分。