早二年曾經推出一隻出色嘅戰術策略射擊遊戲《Mutant Year Zero：Road to Eden》（突變元年：伊甸園之路），製作呢隻遊戲嘅瑞典團隊 The Bearded Ladies 黎緊會出隻新作《Corruption 2029》，類型都係一樣，但係時代背景就變做未來美國，團隊仲講到明今次係非常之 Hardcore，自命高手嘅玩家要留意啦。

《Corruption 2029》為高難度回合制戰術策略射擊遊戲，即係類似《XCOM》咁玩，採用第三身視點。遊戲設定喺近未來嘅美國，由於受到不明神秘物體入侵，令到整個世界腐化同出現怪物。然後就梗係叫玩家帶埋成班兄弟殺入投身戰場，順便搵下腐化嘅原因咁。

本作這強調玩家作出各種戰術規劃，應該使用潛行擊殺，定隱匿行蹤先調查四周環境再決定係咪要打。另外就算戰鬥都有多種方式殺敵，由屋頂進行狙擊，又或者好似薩爾達咁放火燒人都得，不過隨住玩家所決定嘅前進路線以及攻擊手段，將會令關卡嘅難易度產生改變，令遊戲嘅玩法更多變化。

《Corruption 2029》預計於 2 月 18 日推出，遺憾地將由 Epic Games Store 獨佔，大家諗下玩唔玩啦。