Netflix 大熱劇集《怪奇物語》叫好叫座，劇中不論人物衣著、髮型等，處處充滿住濃厚嘅八十年代味道，如果同樣喜愛呢種風格嘅朋友，就唔好錯過《Stories Untold》呢隻遊戲。本作同樣極有八十年代味道，而且氣氛運用出色，令人越玩越上癮。

《Stories Untold》由獨立團隊 No Code 製作，PC 版早於 2017 年 2 月上市，仲持續喺 Steam 上得到「極度好評」評價，而家用機版本就只係啱啱推出無幾耐。本作由四個短篇故事組成，每一章玩家都會處身一個似夢又似真嘅場景，而頭三篇嘅故事表面相都好似無關連，但去到最終回就會將故事串連，揭露整個劇本完整面貌。

每章故事看似無關，但去到最終回就會揭露彼此關係，真係唔玩到尾都唔知結局。圖為第二章「The Lab Conduct」，講係實驗室用各種工具去試一舊不明生物嘅各種反應。

第三章「The Station Process」，身為監測站人員嘅玩家，要喺大風雪中尋找索失蹤嘅隊伍。

遊戲 PC 版嘅玩法主要採用「文字輸入」輸入方式，即係將文字命令輸入並且因應情況作出反應，有時就需要點擊，基本上都係以 Keyboard 同 Mouse 操控為基礎。不過黎到 Nintendo Switch 之後，製作團隊為咗玩家用 Joy-Con 都玩得舒服，特別作出各種調整，好多時只需要揀各個選項就得，唔需要下下打字咁麻煩。

NS 版改為揀選項，唔洗下下打字

外媒一致好評

《Stories Untold》已經於 Nintendo Switch 推出，暫時對應英文及日文，不過啲英文其實唔難。美版售價 $9.99，日版 $980 日圓。