Playstation 1嘅年代影響我幾深遠嘅遊戲，除左大量恐怖動作冒險嘅作品之外，其中有隻叫《建設機械シミュレーター KENKIいっぱい / Dirt Jockey: Heavy Equipment Operator》嘅建築機械模擬遊戲，令到我今時今日對建築機械相關嘅遊戲都情有獨鍾。可惜模擬遊戲向來喺家用機上都唔係熱門選擇，唔係啲惡搞元素重啲嘅都可能無人問津，更何況建築機械模擬遊戲來來去去都係得《Construction Simulator》係正正常常，而最近終於有隻新嘅建築機械模擬遊戲喺 PC 移植到 Switch 度，並且有啲驚喜。

《Demolish & Build》呢隻雖然定位係隻第一身建築機械模擬遊戲，但實質上玩落佢似《GTA》 多過《Construction Simulator》。玩家一開始喺教學關卡學嘅就係「裝修」，開頭得鎚仔同士巴拿兩件工具比玩家使用，賺到錢之後就電鋸、風砲、釘槍甚至塑膠炸藥都有得你用。工程規模亦會越嚟越大，我地就可以買啲大型建築機械去幫手搵錢。同時開始要經營自己嘅「裝修團隊」，而同現實一樣接左工作再判上判，不過一個唔小心嘅話就要幫自己嘅工人「執手尾」。你仲可以買啲特許經營嘅業務去收租，之後就將業務擴展到其他城市。

裝修師傅都識「鷹眼」睇工作目標，咁就唔洗盲舂舂啦

有汗出冇糧出……好彩係劇情需要……

開頭就一個鎚仔就搵細錢

去屎坑玩沖涼鴨？

想賺大錢？努力搵錢買大機接大生意啦！

《Demolish & Build》可用嘅工具同載具都有成十幾廿款，四個遊戲版圖多到有排玩，而且有好多細節係異常地做得仔細，好似拆屋拆牆嘅物理性做得好好，簡單如當你要拆卸一個洗手盤，只要喺支柱進行破壞，成個洗手盤就會塌陷；駕駛載具有多角度視點，而且一款載具有多種功用，駕駛同工程模式都係撳個掣就可以輕易轉換；大型拆卸前又會教你先灑水，如果太大塵嘅話又會因此而扣清潔費。而且仲可以多人遊玩，兩個人一齊揸架推土機拆人屋都幾爽。

拆屋前灑一灑水，免得塵土飛揚要扣清潔費

買左大型機械都仲要考牌架，唔係點識用啊！

呢啲咪叫強拆囉！

一款機械唔係得一個用途，換裝就可以由拆樓變起樓

雖然優點唔少，不過缺點同樣都有。例如駕駛系統、地圖指示、建築方式太簡易等等，呢種不完善係令玩家覺得「點解唔可以做好少少呢」。加上遊戲中第一個城鎮嘅荒蕪，好易令到玩家第一印象唔多滿意。所有野都唔係致死嘅大錯，不過玩家要花多少少時間去習慣或者接受佢嘅不足。

擺好晒啲材料，撳個掣就起晒板

砌好板都仲未完，記得要釘實佢啊！

玩左三日，夾埋幾十個鐘先離開第一個城，真係有排玩！

I came in like a wrecking ball~

總結

《Demolish & Build》唔似《Construction Simulator》有住好多嘅大型建築機械品牌支持，但喺建築機械模擬遊戲呢個種類上加上《GTA》式 Open World 任務同經營嘅方向，相信之後嘅續作會有更好嘅成積。雖然 Switch 版操控感我本人覺得好過電腦版，不過大家驚喺 Switch 度一次過比 15 美金唔啱玩冇仇報嘅，可以趁住 Steam 呢排仲做緊特價， $5 港幣買嚟喺電腦度試下手感，啱 Feel 先再喺 Switch 度買嚟玩都唔遲。