於 2018 年 8 月 7 日首度發行嘅《Dead Cells》遊戲，自推出以後一直擁有極高評價，登錄平台亦由一開始嘅 PC 版本，陸續擴闊到 PS4、Switch 以及最近公佈嘅 iOS 平台上面。官方早前就公佈左遊戲嘅第二個付費 DLC「The Bad Seed」嘅內容，並預計於 2020 年 2 月 11 日全線上架，定價為美金 4.99。

《Dead Cells》由法國獨立研發團隊 Motion Twin 製作，係一隻惡魔城類型（Metroidvania）嘅動作遊戲。遊戲場景係一個會不斷變化既城堡，玩家透過不斷探索、擊敗 Boss 去解開新嘅力量及武器等等。

今次嘅「The Bad Seed」DLC 包括兩個全新關卡，分別名為「荒廢植物園」以及「流放者的泥潭」，亦會新增名為「Nest（巢）」嘅新 Boss 關卡。關卡裡面嘅敵人難度頗高，會同時使用吹箭以及長槍追擊玩家，同時場景會有食人嘅植物出現，喜歡挑戰高難度嘅玩家不容錯過。

DLC 同時會改善遊戲平衡度，以及增加道具及武器種類，有興趣嘅玩家可以參考 Steam 版網址。