塔防（Tower Defense）類型遊戲多年前興起，之後越出越多種類。黎緊就有隻新嘅塔防遊戲，有得落場打又有得起塔，最重要係有得多人連線合作。遊戲叫做《Dungeon Defenders: Awakened》，二月就有得玩，準備定叫朋友一齊入啦。

《Dungeon Defenders: Awakened》由 Chromatic Games 開發，屬於塔防動作遊戲，動作部份採用第三身視點。遊戲前作於 2010 年推出，推出後獲得玩家一致好評。

今集同前作類似，都係將塔防同動作遊戲融合，玩家要建造及升級炮塔、防禦建築，構成防護網阻止敵人前進；另一方面要控制英雄落場幫手殺敵。現時已知可供玩家選擇職業有騎士、武僧、魔法師、盜賊等四個職業，當然每個職業都會有專屬技能及武器防具裝備，而武器更會對應冰、火等屬性，配搭頗為豐富。

《Dungeon Defenders: Awakened》已知會有五種遊戲模式、十二張戰役地圖以及十二隻寵物，並且支援最大四人連線合作，而遊戲推出後亦會持續更新。

《Dungeon Defenders: Awakened》PC Steam 版會於本年第一季率先推出供玩家體驗，而 Nintendo Switch 版就會喺第二季推出，PS4 同 Xbox One 版就於本年第三季度推出。