LEGO奧脫福球場喺 2 月 1 號就正式全港開售，當日喺朗豪坊 LEGO Certified Store 入手嘅，仲有機會得到 6322501-United Trinity Statue 做贈品。不過好多朋友就話今次 10272 Old Trafford 太大，喺屋企真係冇咩位擺得到。但曼聯迷又點捨得放棄呢個擁有 LEGO 奧脫福球場嘅機會呢？

Microscale Old Trafford by Fruth Ho

呢位 Fruth 師兄其實都同大家一樣好想擁有個奧脫福球場，奈何土地問題都只好放棄入手 10272 Old Trafford。不過望下望下又見手頭上有堆散件，咁不如就砌個微縮版嘅 LEGO奧脫福球場當擁有過啦。呢個接近縮細 6 倍嘅微縮版 10272 Old Trafford，搵 12 吋 Figure 放埋一齊係咪好似啲 Figure 砌出嚟咁呢！

呢張相係咪好熟口熟面呢？！其實係Fruth佢用 Figure 扮返官方宣傳相片㗎

縮到咁細同原版 10272 Old Trafford 相比，都真係冇得頂！

砌好同大家分享之後，世界各地好多玩家都不斷問佢「會唔會有製作書分享？」「跪求 Partlist」等等。而我當然都八卦下佢會唔會教大家整呢個作品，結果佢真係唔介意教大家砌呢個微縮版奧脫福球場「本來都諗住放上 LEGO Ideas 架，不過畀官方話同最近嘅產品( 10272 )版權重疊所以被秒 Ban。」官方唔受又唔介意教大家，咁我梗係追問 Fruth 師兄幾時會有教學啦？

「我識砌但唔識用電腦整返個教學出嚟……. 😛 ，但我可以借個實物比你架！」

319件組件就砌到呢個 8 cm x 9.5 cm 嘅微縮版 LEGO奧脫福球場

喺 Fruth 師兄 嘅慷慨之下，我膽粗粗第一次為大家製作微縮版 LEGO奧脫福球場製作書同Partlist！始終第一次去做，如果整得唔好睇唔明嘅話，希望大家多多包涵。

而 Partlist 亦預備好比大家，計過執件大約只係港幣三百幾到四百左右價錢，想砌呢個微縮版 LEGO奧脫福球場嘅朋友就自己搵地方執件砌啦！

微縮版 LEGO奧脫福球場 Partlist 下載傳送門