隨住 VR 興起，越黎越多大型 VR 場開幕，好似我地之前都有去玩過嘅 Sandbox VR 。今次我哋受到另一間 VR 場 Zero Latency 嘅邀請，一試坊間少見嘅「VR 對戰」。玩完之後大家都好攰但又想再 Encore，同事前預想嘅感覺完全不同，非常過癮！
世界各地有超過二十間 Zero Latency，香港屬於亞洲第二間
入場前會有靚女職員姐姐詳細講解遊戲玩法，聽完講解就著裝備啦。同其他 VR 場一樣，都係使用背包型電腦 + VR 眼鏡，而 Zero Latency 所用嘅背包型電腦係我地用過最輕嘅，跑動時並無太大負擔。另外 VR 眼鏡並無預留空間，即係戴眼鏡人士要先除眼鏡玩。不過 VR 眼鏡本身有得調教 100 – 400 度近視，都叫有照顧到四眼一族。
VJGamer 一行人準備去送死
整套裝備頗輕，係我地玩過最輕嘅 VR 裝備
遊戲開始前，靚女職員姐姐細心講解
Zero Latency 值得一提係佢哋提供嘅槍械，雖然只有一種，但係每把槍都預設自動步槍同霰彈槍二種射擊模式，自動步槍就噠噠噠噠唔洗點講啦，霰彈槍每下射擊前必需拉「Pump」先可以射擊，對女仔黎講可能會有啲攰，不過相對威力強大好多，要設換模式只要按槍托下嘅模式設換鍵就得。
槍械雖然只有一種，但係每把槍都預設自動步槍同霰彈槍二種射擊模式，加上應用咗黑科技，射擊接近零延遲
槍械外觀，都幾有重量，女仔拎得耐應該會手軟
對戰空間約 2000 呎，我哋 6 個人對戰都仲係好鬆動
戴上 VR 眼罩之後雖然睇唔到野，不過有靚女職員幫大家著好其他裝備，所以唔洗擔心
我地玩嘅「VR 對戰」叫做「Sol-Raiders」，最多可以 8 人同場對戰。遊戲分為三個小局，第一同第三局都係要將頭上嘅大波射入敵方基地，分別只係第三局地型複雜小小。第二局就要同敵隊鬥快到資源點搶走當中嘅資源，搶得最多者勝，不論邊個類型殺人都並非係重點，因為完成目標先會有分，同分先會再計 K/D 數。相信聰明嘅讀者睇到呢度應該明白真正嘅玩法，就係入場前同對面隊傾好玩齋殺人，咁先係最抵玩架！
另外呢個 Game 死咗之後係唔會自動重生的，玩家必需去返自家基地先會復活，亦即係話當你越快到達基地就越快復活，所以起勢地跑吧！（超耗體力）
遊戲目標係推上面個波入對面基地，分工默契同樣重要
唔鐘意圍內互毆嘅，同樣有其他選擇。「Outbreak Origins」係我地玩嘅第二隻遊戲，講就話大家要喺滿佈喪屍嘅城入面搵解藥，實際上當然係見野就殺啦。同樣係打喪屍，但係活用咗大場地優點，玩家係 VR 世界內會一直前進並通過多個場景，當中不乏緊張刺激場面，有時又會有特別槍械執，感覺就好似玩緊立體版《World War Z》咁。另外遊戲入面會有高低差斜台，行過去時係會 Feel 到離心力的，好鬼正！（據職員話另一遊戲中嘅獨木橋曾經嚇到有個女玩家唔敢郁）
成班人玩完之後應該都會覺得好攰，不過唔洗急住走，因為喺大堂度會有部電視，顯示返上場對局玩家嘅成績表。同時當場內有人玩緊的話，呢部電視會即時顯示場中玩家分數以及走位。（我哋就發現後面班人成日行埋一堆無充分利用空間，原來自己都唔係玩得太差 :)）
除咗呢二隻遊戲外，亦有「ENGINEERIUM」探索非戰鬥類遊戲、大量高低差位「SINGULARITY」太空射擊遊戲等，各有各好玩。收費方面佢地就一節節咁收計，三十分鐘為一節，亦即係大家可以玩二隻 15 mins 遊戲或者一隻 30 mins 遊戲，自由組合。收費正常價錢 HKD $350 一位，不過佢地就成日做 HKD $298 推廣優惠，每日夜晚仲有 Night Session HKD $220 一位，頗為抵玩，有興趣可以去佢地網站預約。
