之前任天堂隻《Ring Fit Adventure》（健身環大冒險）全球大賣，最高峰時連日本 Big Camera 都一返貨就十分鐘比人掃晒，香港亦都一度炒高至 $9xx。咁多瘋搶，最主要原因都係官方聲稱本作真係可以幫到玩家健身，針對不同部位作出鍛練。但係實際掂唔掂大家都係得個估字，不過日前就有位玩家以用三十日實測，親證原來真係 Work！

菲律賓玩家 Migui Minaj 早二日就出咗個 PO，內容就係已經玩咗三十日《Ring Fit Adventure》截圖，以及自己三十日前後自拍。喺佢嘅相片中我地見到佢由燒山咁款變返做個後生仔，外貌改變頗大，你話控制體重幾咁緊要呢。而且根據佢所講，每日遊玩時間都只係 25 分鍾，功效神奇！不過佢本人都話運動同時都需要注意均衡飲食，咁先會令運動達致最大效果。（其實外國仲有唔少成功例子，真心掂）

左邊係三十日前，幾似燒山

Migui Minaj 另一個身份係 2D Artist，都有啲遊戲相關作品，有興趣嘅可以去佢 IG 睇。（@miguimonkey）

睇見呢位玩家嘅變化，大家係咪都有興趣去入返隻呢？不過提提你，要買的話盡量唔好買行貨，原因？你懂的。