2019 年下半年，相信大家都無咩心機打機，今日講呢隻《黑相集：棉蘭號（The Dark Pictures Anthology: Man of Medan）》其實已經係 2019 年 8 月 30 日推出嘅遊戲，不過編輯部都係最近先抽到時間玩。

《棉蘭號》由 Supermassive Games 工作室開發、Bandai Namco 發行，為一隻電影式多人互動嘅恐怖遊戲，當然你亦都可以一個人玩，不過如果你有 3～5 位朋友可以共同遊玩嘅話，先至會獲得最佳遊戲體驗；一個人玩嘅話氣氛絕對會無咁好。

《黑相集：棉蘭號》呢一集只係開端，工作室目標係將遊戲開發成一系列嘅作品，每集故事大綱唔同，但係都會有一個共通點，就係遊戲裡面好多可以比你預視到可怕未來嘅「相片」。

《棉蘭號》改篇自真人真事嘅事件，所以講少少事件背景先：

棉蘭號（Ourang Medan）係一艘荷蘭註冊嘅貨船，同時亦為馬六甲海峽一艘好出名嘅幽靈船。時為 1947 年，當時美國一艘貨輪接到棉蘭號嘅求救訊號，但係聽到一句「I am dead（我死了）」之後就失去聯繫。

搵到架船之後，發現船上面嘅船員都已經全部死哂，而佢地臉上都不約而同地，充滿著驚恐嘅表情，死狀僵硬；但係到底佢地嘅死因係乜野，就各有說法，但係永遠都唔會有人知道真相。

《棉蘭號》講述主角一行五人，一向鍾意出海潛水，由於估計某處海域可能會有二次大戰嘅墮機殘骸，所以僱船出行。不過，呢班後生仔嘅初始性格，就非常「唔識死」，結果，因為唔聽勸而為自己招來麻煩，結果陷於「棉蘭號」呢架幽靈船上面。

遊戲裡面，玩家會不時搵到「相片」或者「圖畫」，而呢啲圖像，會帶比你啟示，暗示如果你採取某啲行動，咁你可能就會害死自己或者害死隊友。

不過，呢啲暗示有時都幾隱晦，同埋揀選項係有時限性，仲有好多時會係極考反應嘅 QTE，所以，我地第一次玩時，係好不幸咁殺左一個隊友的，RIP。

遊戲裡玩家共有五個角色，各有個性，各有身份；不過佢地嘅性格，隨住玩家喺遊戲中嘅選項，係會一路改變的。例如你可以將一個大義凜然嘅人變成自私精，亦可以將一個無腦二世祖變成可靠嘅領隊。

正因為遊戲中有唔同選項，所以劇情會有好多變化嘅可能性，例如係你可以好早期就已經領便當、亦可能全軍覆沒，全部人死喺船上；當然全部人無傷脫出係最美麗嘅結果，不過要達至呢個結局嘅，請務必要提清楚所有提示、同埋準備好面對隨時彈出黎嘅 QTE。

每一章節完結時，都會有角色整理，話比你知各個角色而家嘅狀況、角色之間嘅關係、以及角色於該章節嘅表現值得乜野評價；雖然佢嘅評核準則我未係好掌握到，不過見到「不受歡迎」呢啲評價，其實幾有喜感。

作為《黑相集》系列嘅第一集，《棉蘭號》當然仲有好多改善空間，例如係活動嘅靈活性、同埋人物面部模組做得「皮膚太好」，所以望落去唔夠自然；儘管如此，我都認為係一個不錯嘅嘗試，有機會亦想同朋友再玩一次感受其他結局，例如係試下最快速度整死哂所有人（喂）

帶領玩家進入故事嘅神秘「說書人」會於章節開始之前，提供唔同嘅小提示

就黎過年，表兄弟姐妹黎拜年，或者去朋友屋企，出面打麻將，你地入房打機嘅話，呢隻《棉蘭號》相信係大家不錯嘅選擇。遊戲有 Steam、PS4 以及 XBox 版本，全部都有中文字幕對應，各位玩家朋友可以考慮下入手喔！