2019 年對於所有香港人黎講，都係好漫長嘅一年。呢一年入面，我地共同經歷過好多，亦知道好多朋友因為欠缺心情，所以今年花喺打機上面嘅時間少左好多（例如編輯部就完全無心機屠龍）
2019 一整年間，曾經造成話題嘅遊戲有好多，亦有唔少黑馬或者細廠作品可能被大家忽視左；我地就集合哂編輯部多位成員嘅意見，整理左一份「2019 年十大推薦遊戲」比大家參考。
首先係編輯部一致認同：「Game of the Year 2019（VJGamer 版本）」依然係《隻狼 SEKIRO》！
當然唔係人講我地又講，一來我地上下多年黎都係 From Software 作品嘅 Fans，二來《隻狼》無論係劇本創作嘅深度、作為動作遊戲嘅難度以及動作精細度、人物刻劃嘅魅力，以及遊戲整體帶出黎嘅戰國末期頹廢美感，每一樣都令人心醉！所以《隻狼》作為一隻原創全新作品，今年嘅 GOTY 真係當之無愧！
【2019 年十大推薦遊戲】排名除第一位外不分先後。
（1）隻狼 SEKIRO
遊戲貫徹 From Software 風格，故事留有大量空間供玩家聯想、討論。而遊戲戰鬥系統極之出色，擺脫近年遊戲慣用升 LV、升裝備方程式。遊戲要求玩家鍛練個人技術，功力夠的話即使「零強化」仍然可以擊殺每一隻 Boss，令玩家重拾最原始破關的感動。唯一可惜嘅係遊戲並無 PVP 系統，令遊戲耐玩度下降。
【遊戲感想】解釋你聽點解好玩 神作《隻狼：暗影雙死》難得有道理
（2）Biohazard RE:2
《生化危機》系列重製呼聲最高嘅第二集，自宣佈後一直被受期待，推出後亦無令一眾玩家失望。重製版以二代嘅劇本配以第三身射擊遊戲玩法，謎題以及劇情都有大幅變動，但不失原版風味同時又帶比玩家新嘅遊戲享受。本篇以外，就連《第五生還者》、《豆腐》呢類模式都得到完整重製，可見製作團隊之用心。
而《Biohazard RE:2》嘅推出仲為業界定下完整重製版定義：「經典遊戲重製版請以本作為標準，咁先叫做有誠意兼稱得上對得住玩家」。
（3）火焰之紋章～風花雪月～
神婆：作為混合 RPG 以及戰棋元素嘅遊戲，《火焰之紋章～風花雪月～》整體平衡算係做得唔錯，雖然戰鬥就算玩「最難」都仲係難度略低，不過立體嘅人物性格、對於革命以及「正義」嘅劇本描寫，對於好多朋友黎講，可能係一份最佳嘅鼓勵。
早前我都為遊戲寫過感想文，好多諗法我就唔再喺度重覆，有興趣嘅朋友可以睇下！
【遊戲感想】世上沒有一場不流血的革命！為了理想而戰《火焰之紋章～風花雪月》本年度最佳遊戲之一
（4）A Plague Tale: Innocence（瘟疫傳說：無罪）
神婆：唔係淨係大廠 3A 大作先至叫做好 Game，呢隻《A Plague Tale: Innocence》有冒險成份，又可以用女主角成日用火魔法打敵人，劇本發展亦都幾出人意表，可以話係非常驚喜嘅作品！呢隻遊戲除左 PS4 仲有 Steam 版，好似成日都有 Discount，有興趣嘅朋友，又係可以睇下早前我寫嘅感想文（對唔住我好長氣）：
【遊戲感想】以為講瘟疫點知最後係講大陰謀《A Plague Tale : Innocence》劇本評分極高必玩佳作
（5）Star Wars Jedi: Fallen Order（星球大戰 絕地：組織殞落）
阿九：《Star Wars》主題嘅遊戲喺 EA 手上，近年真係負皮多到入健力士紀錄。今年嘅《Star Wars Jedi: Fallen Order》比返 Respawn Entertainment 去做開發，而且放棄多人遊玩，乖乖地寫返個故仔比星戰迷，加插《Star Wars 三、四》《俠盜一號》劇情同人物喺當中比星戰迷當開心下。
遊戲性集百家大成，《Dark Souls》式迷宮設計加《Batman: Arkham》嘅場景迷題及收集要素，戰鬥花樣唔會沉悶之餘仲有啲強敵會突發挑戰，以近年最好嘅 Star Wars 主題遊戲呢個講法去形容《Star Wars Jedi: Fallen Order》絕不為過。
加上睇完《Star Wars : The Rise of Skywalker》嘅落差同失望，《Star Wars Jedi: Fallen Order》係絕對可以彌補返星戰迷嘅空虛。
（6）13 機兵防衛圈
神婆：鍾意劇情向 + 非文字型遊戲嘅朋友，《十三機兵》絕對係編輯部今年極力推薦之作。
將平行時空、複製人等等題材塞哂落一隻 Game 而唔突兀，仲有超級出人意表嘅劇本鋪排，雖然系統仲有好多改善空間，不過都仍然係非常精彩嘅作品。繁體中文版 2020 年春季登場！
無劇透感想文：
【遊戲感想】因為執念而產生嘅時空旅行《十三機兵防衛圈》非動作類遊戲神作無誤
（7）Death Stranding（死亡擱淺）
作為小島 Fans，呢隻由佢自家遊戲公司「Kojima Productions」第一款作品必定係 2019 話題之作，不但有創新遊戲玩法、電影級故事，仲有一大班名星名人客串座陣，製作出電影、遊戲、甚至乎音樂融為一體的藝術品。
細玩遊戲就會發覺小島依然「寶刀未老」，遊戲彩蛋豐富，有好多設定更將故事同遊戲設定巧妙融合，例如主角設定為「回歸者」，能力係起死回生，呢個正正「解釋」平時打機 Game Over 主角重生再黎過咁。
主角運送的貨物及身上裝備再唔係放係「百寶袋」，一件件忠實呈現係主角身上，種種巧妙融合令玩家更加投入《Death Stranding》的遊戲世界。
（8）Bloodstained : Ritual Of The Night（血咒之城：暗夜儀式）
《惡魔城》之父五十嵐孝司最新作品，遊戲早於 2015 年 5 月對外公布，並於同於完成 Kickstarter 眾籌（仲係當年最高眾籌金額遊戲項目），然後遊戲延期數次後終於喺今年推出。以《月下夜想曲》為藍本，加入「碎片」系統令攻擊組合更多元化。雖然遊戲整體流程較短，但仍無損本作係今年最佳橫向動作遊戲之名。
【遊戲評測】《血咒之城：暗夜儀式》新生惡魔城 四年等待完全值得
（9）The Outer World（外圍世界）
製作《Fallout: New Vegas》班底最新作品，雖然並唔係打住《Fallout》招牌，但仍然充滿濃厚嘅《Fallout》味。貫徹超自由世界精神，遊戲有接近無限咁多分支，而且不論主線定支線，每個對話選項都極之豐富。想做好人左膠又得，想做壞人亂咁殺人又得，想做騙子由頭呃到尾又得。不過本作戰鬥系統就並無《Fallout》嘅「V.A.T.S.」做得咁好，相關嘅 Perk 亦都唔見得有幾出色，期待下集得到改善。
（10）Frostpunk（冰封龐克）
香港極之少人提起嘅作品，類似《Sim City》咁玩嘅建設策略類遊戲。玩家將扮演領導者，帶領人民喺冰封世界中生存。為咗達成呢個目的，需要進行城市規劃、制定法律、分配工作等等。就咁睇好似好簡單，但當中暗藏「倫理」、「道德」嘅選擇。例如小孩之你會選擇照顧佢等佢成長，定係叫佢工作當成勞力？工人受傷應該用額外嘅資源醫治，定係幫佢截肢甚至解佢？更極端嘅係當食物短缺，人肉都可以變做食物。
以上種種都係要求玩家作出最適合團體生存落去嘅方案，而唔係最人道講求道德嘅選擇。加上遊戲畫面、配樂、玩法等等都頗為出色，絕對係被忽視的佳作。