於全球都擁有唔少 Fans 嘅作品《Fate/stay night》，旗下有一套世界觀衍生嘅輕鬆系作品《衛宮家今天的餐桌風景（衛宮さんちの今日のごはん）》，而角川早前就宣佈《衛》即將推出料理遊戲《毎日♪ 衛宮さんちの今日のごはん》，對應平台為 Switch，預計 2020 年春季正式發售，數位版限定。

《毎日♪ 衛宮》嘅玩法有少少似當年嘅《Cooking Mama》，都係以唔同嘅控制方式去製作料理，而遊戲中亦會有動畫片段以及特別收錄嘅劇情，加上遊戲近乎全語音嘅系統，相信對於 Fans 黎講有絕對嘅吸引力！

作品原作者 TAa 老師亦有參與遊戲嘅開發，務求喺角色同埋畫面呈現上面做到 100％還原。

《衛宮家今天的餐桌風景》於 2016 年開始於角川網上雜誌《Young Ace UP》上連載，故事發生喺無聖杯戰爭嘅「冬木市」，衛宮同埋 Saber 等從者角色嘅生活就係如何製作出好味嘅料理，係一套輕鬆治癒系作品。

作品於 2017 年末時宣佈動畫化，而呢套動畫亦成功勾起唔少唔認識《Fate》系列嘅朋友對於原作嘅興趣，所以如今遊戲化都頗令人期待。有正式發售日我地會再同大家報導！